राप्ती-५ सिसहनियाँमा सहकारी मार्फत किसानलाई च्याउ खेती तालिम प्रदान

सिसहनियाँ ७ पुस । दाङको राप्ती गाउँपालिका वडा नम्बर ५ सिसहनियाँमा रहेको बगर कृषि सहकारी संस्थाले किसानहरूलाई च्याउ खेती तालिम प्रदान गरेको छ ।

कृषि ज्ञान केन्द्र दाङको आयोजना र बगर कृषि सहकारी संस्था लिमिटेड राप्ती ५ सिसहनियाँको सहकार्यमा सम्पन्न तालिममा ३० जना महिलाको सहभागीता रहेको थियो ।

यसै बीच राप्ती गाउँपालिकाका अध्यक्ष प्रकाश विष्टले च्याउ खेतीलाई सहकारीमार्फत सामूहिक रूपमा व्यवसायिक बनाउन आग्रह गरेका छन् । आइतबार राप्ती गाउँपालिका वडा नम्बर ५ सिसहनियाँमा च्याउ खेती सम्बन्धी एकदिने तालिम उद्घाटन गर्दै अध्यक्ष विष्टले उत्पादन सँगसँगै बजारीकरणलाई पनि विशेष प्राथमिकता दिनुपर्ने बताएका हुन् ।

अध्यक्ष विष्टले भने, “च्याउ खेतीलाई सहकारीको माध्यमबाट व्यावसायिक बनाउनु आवश्यक छ। सहकारीले सामूहिक प्रयासमार्फत लागत घटाउँछ, उत्पादन बढाउँछ र बजारसम्म पुग्न मद्दत गर्दछ। पालिकाले च्याउ खेतीलाई आर्थिक समृद्धिको प्रमुख साधन बनाउन आवश्यक सबै सहयोग उपलब्ध गराउनेछ।”

त्यस्तै उनले सहभागी महिलाहरूलाई तालिममा सिकेका कुराहरू व्यवहारमा उतार्न र सहकारीमार्फत दीर्घकालीन योजना बनाउन आग्रह गरे। कार्यक्रममा पालिकाकी उपाध्यक्ष कमलापती चौधरीले महिलाहरूको आत्मनिर्भरता र सामूहिक प्रयासले च्याउ खेतीलाई दिगो बनाउने विश्वास व्यक्त गरे।

तालिममा वडा नम्बर ५ का वडा अध्यक्ष देवप्रसाद चौधरी, कार्यपालिका सदस्य रणबहादुर पुजाली, सावित्री चौधरी, कृषि प्रविधि निर्मला गिरी, निर्मला पौडेललगायतको उपस्थिति रहेको थियो। उक्त तालिमले च्याउ खेतीकाे प्राविधिक ज्ञान र व्यावसायिक सम्भावनाबारे सहभागीहरुलाई मार्गदर्शन गरेको ज्ञान केन्द्रका वरिष्ठ बाली संरक्षण अधिकृत पिताम्बर बस्नेतले बताए।