देशभर शुक्रबार थप ३,९१५ जनामा कोरोना सङ्क्रमण पुष्टि, २,११८ जना संक्रमण मुक्त, २७ जनाको मृत्यु
काठमाण्डाै २९ साउन । नेपालमा कोरोना सङ्क्रमण पुष्टि हुनेको सङ्ख्या आठ लाख नाघेको छ । देशभर शुक्रबार थप ३ हजार ९ सय १५ जनामा कोरोना सङ्क्रमण पुष्टि भएसँगै कुल सङ्क्रमितको सङ्ख्या आठ लाख दुई हजार पाँच सय ६६ जना पुगेको स्वास्थ्य मन्त्रालयले जनाएको छ ।
यीमध्ये ७ लाख २८ हजार ५ सय ३२ नमुनाको पीसीआर विधिबाट गरिएको परीक्षणमा सङ्क्रमण पुष्टि भएको हो भने ७४ हजार ३४ नमुनाको एन्टिजेन विधिबाट गरिएको परीक्षणमा सङ्क्रमण पुष्टि भएको हो ।
यस्तै शुक्रबार ११ हजार ७ सय ८ जनाको पीसीआर र ६ हजार आठ सय ७४ जनाको एन्टिजेन गरी १८ हजार ५ सय ८२ जनाको नमुना परीक्षण गर्दा ३ हजार ९ सय १५ जनामा कोरोना सङ्क्रमण पुष्टि भएको मन्त्रालयले जनाएको छ । यो कुल परीक्षणको २१ प्रतिशतभन्दा धेरै हो ।
यस्तै शुक्रबार थप २ हजार १ सय १८ जना निको भएसँगै कोरोना सङ्क्रमणमुक्त हुनेको सङ्ख्या ६ लाख ७९ हजार चार सय ९५ जना पुगेको छ । यही अवधिमा थप २७ जनाको कोरोना सङ्क्रमणका कारण ज्यान गएको छ । यो सहित ज्यान गुमाउनेको सङ्ख्या १० हजार दुई सय ३९ जना पुगेको छ ।
अहिले नेपालमा ३८ हजार सात सय ९८ जना सक्रिय सङ्क्रमित छन् । सक्रिय सङ्क्रमितमध्ये सात सय ३६ जनाको आईसीयू र एक सय ८६ जानको भेन्टिलेटरमा उपचार भइरहेको छ ।
