दाङ सहित विभिन्न जिल्लामा बुधबार साँझ देखि तीव्र हावाहुरीको जोखिम, सतर्क रहन आग्रह

दाङ १५ वैशाख । राष्ट्रिय विपद् जोखिम न्यूनीकरण तथा व्यवस्थापन प्राधिकरणले लुम्बिनी प्रदेशका बर्दिया, बाँके, दाङ र अर्घाखाँचीसहित आसपासका जिल्लामा भोलि वैशाख १६ गते साँझदेखि तीव्र गतिको हावाहुरी चल्ने सम्भावना रहेको भन्दै सतर्क रहन आग्रह गरेको छ ।

जल तथा मौसम विज्ञान विभाग का अनुसार बुधबार साँझ पौने ६ बजेबाट सुरु हुने हावाहुरी पर्सि वैशाख १७ गते बिहान पौने ८ बजेसम्म रहने अनुमान गरिएको छ । यस अवधिमा मेघगर्जन, चट्याङ, असिना र वर्षासहितको प्रणाली पश्चिमबाट पूर्वतर्फ सर्दै जाने सम्भावना रहेको जनाइएको छ । प्राधिकरणका अनुसार हावाहुरीका कारण रुख ढल्ने, कमजोर संरचना भत्किने, घरका छाना उड्ने, विद्युत तथा सञ्चार सेवा प्रभावित हुनेजस्ता जोखिम बढ्ने देखिएको छ । विशेषगरी तराई तथा भित्री मधेशका जिल्लामा बढी प्रभाव पर्ने आकलन गरिएको छ ।

यसै सन्दर्भमा प्राधिकरणले नागरिकलाई सकेसम्म घरभित्रै बस्न, झ्यालढोका मजबुत रूपमा बन्द गर्न तथा जस्तालगायतका कमजोर छाना भए सुरक्षित बनाउने आग्रह गरेको छ । त्यस्तै हावाहुरी चलिरहेका बेला अग्ला रुख, खम्बा तथा बिजुलीका तारमुनि नबस्न र लत्रिएको तार नछुने सावधानी अपनाउन पनि अनुरोध गरिएको छ ।