दलहरूकाे अवस्था र तालमेलबारे ३ दिनभित्र प्रतिवेदन पठाउन सत्ता गठबन्धनकाे निर्देशन

काठमाण्डाै २३ चैत । सत्ता गठबन्धनको चुनाव तयारी तथा अनुगमन समितिले स्थानीय तहमा गठबन्धनमा आबद्ध दलहरूको अवस्था र तालमेल आवश्यकताबारेको प्रतिवेदन आउँदो शनिवार सम्म पठाउन प्रदेश संयन्त्रलाई निर्देशन दिएको छ ।

प्रधानमन्त्री निवास बालुवाटारमा आज बुधवार बसेको बैठकले प्रदेश संयन्त्रलाई २६ गते शनिवारभित्रमा प्रतिवेदन पठाउन निर्देशन दिएको समिति सदस्य डा. बेदुराम भुसालले जानकारी दिए । यसअघि प्रदेश संयन्त्रलाई २२ गतेभित्र प्रतिवेदन बुझाउन भनेकोमा प्राप्त नभएकोले समय थप गरिएको उनले बताए ।

समितिको अर्को बैठक २७ गते आइतवार बस्ने भएको छ । आजको बैठकले गठबन्धनबाट उम्मेदवार बन्नेहरूको साझा मापदण्ड बनाउने निर्णय पनि गरेको छ । उम्मेदवार चयनबारे पार्टीहरूको आ–आफ्नो विधि भए पनि साझा उम्मेदवार चयनका लागि न्यूनतम मापदण्ड बनाउने निर्णय गरेको र मापदण्ड कस्तो हुने भन्नेमा छलफल सुरु भएको उनले बताए ।

हिजो मङ्गलवार बसेको सत्ता गठबन्धनको बैठकले कांग्रेसका वरिष्ठ नेता रामचन्द्र पौडेलको नेतृत्वमा १० सदस्यीय निर्वाचन तयारी तथा अनुगमन समिति बनाएको हो । सत्ता गठबन्धनले समितिलाई वैशाख ३० गतेका लागि तोकिएको स्थानीय तहको चुनावमा हुने गठबन्धन र तालमेलको तयारी तथा अनुगमनको जिम्मेवारी दिएको छ ।