रामेछापमा मतदान सामग्री बोकेको गाडी दुर्घटना : मतदान अधिकृत सहित २ को मृत्यु, ७ जना घाइते

रामेछाप १८ फागुन । रामेछाप नगरपालिका–२ स्थित सिरुबारीमा मतदान सामग्री र निर्वाचन कर्मचारी बोकेको गाडी दुर्घटना हुँदा दुई जनाको ज्यान गएको छ।सोमबार देउरालीतर्फ जाँदै गरेको ना ७ ख ६७६८ नम्बरको गाडी दुर्घटनामा परेको हो। दुर्घटनामा प्रहरीका असई पर्शुराम यादवको घटनास्थलमै मृत्यु भएको थियो।

प्रमुख जिल्ला अधिकारी श्यामकृष्ण थापाका अनुसार दुर्घटनामा गम्भीर घाइते भएका मतदान अधिकृत डोरप्रसाद घिमिरेको उपचारका क्रममा मृत्यु भएको छ। उनको मन्थली अस्पतालमा उपचार हुँदै गर्दा निधन भएको हो। घिमिरेलाई रामेछाप–२ को वडा कार्यालय भवन, साँघुटार (ख) मतदान केन्द्रमा मतदान अधिकृतको रूपमा खटाइएको थियो। उनी रामेछाप नगरपालिका–३ स्थित साँघुटारमा रहेको रुद्राक्षश्वर माध्यमिक विद्यालयका शिक्षक थिए।

दुर्घटनामा घाइते भएका अन्य सात जनालाई हेलिकप्टरमार्फत काठमाडौं पठाइएको प्रमुख जिल्ला अधिकारी थापाले जानकारी दिएका छन्। गाडीमा निर्वाचनका कर्मचारी तथा मतदान सामग्री रहेको जनाइएको छ। दुर्घटनाको कारणबारे थप अनुसन्धान भइरहेको जिल्ला प्रशासन कार्यालयले जनाएको छ।