राप्तीमा कार्तिक २८ गतेदेखि पालिका स्तरीय राष्ट्रपति रनिङ शिल्ड प्रतियोगिता हुने

भालुवाङ २३ कार्तिक। दाङको राप्ती गाउँपालिकामा आगामी कार्तिक २८ गतेदेखि पालिकास्तरीय राष्ट्रपति रनिङ शिल्ड खेलकुद प्रतियोगिता आयोजना हुने भएको छ।

गाउँपालिकाभित्र रहेका सम्पूर्ण सामुदायिक तथा संस्थागत विद्यालयका प्रधानाध्यापकहरूको बैठकले उक्त निर्णय गरेको शिक्षा, युवा तथा खेलकुद शाखा प्रमुख विश्वास विकले जानकारी दिएका छन् । प्रतियोगिता गाउँपालिकाको आर्थिक सहयोग तथा वडा नं. ४ मा रहेको माध्यमिक विद्यालय मौरीघाटको आयोजनामा कार्तिक २८ गतेदेखि ३० गतेसम्म तीन दिन सञ्चालन हुने छ। गत वर्षको रनिङ शिल्ड खेलकुद प्रतियोगितामा विजयी विद्यालयले अर्को वर्षकाे प्रतियोगिता आयोजना गर्ने परम्पराअनुसार यस वर्ष प्रतियोगिताको आयोजना गर्ने जिम्मा सो विद्यालयले पाएको हो।

गाउँपालिकाले खेलकुदको माध्यमबाट विद्यार्थीहरुको शारीरिक, मानसिक तथा संवेगात्मक क्षमताको विकासका साथै आपसी मेलमिलाप र प्रतिस्पर्धात्मक भावना अभिवृद्धि हुने अपेक्षा गरेकाे शाखा प्रमुख विकले बताए। प्रतियोगितामा गाउँपालिका अन्तर्गतका आधारभूतदेखि माध्यमिक तहमा अध्ययनरत विद्यार्थीहरूलाई विभिन्न खेल विधामा सहभागी गराइने जनाइएको छ।