मृत्यु सँग लडिरहेका झागु दम्पती चिसो भुईमा सुत्न बाध्य : आशाका किरण संस्थाद्वारा सहयोग
भालुवाङ १० कार्तिक । दाङको राप्ती गाउँपालिका वडा नम्बर ५ लठ्ठहवाका झागुप्रसाद चाैधरीका दम्पती चिसो भुईमा सुत्न बाध्य भएका छन् ।
विगत ३ वर्ष देखि प्यारालाइसिस भएर मृत्यु सँग लडिरहेका झागु सुत्ने खाट नहुँदा चिसो भुईमा सुत्न बाध्य छन् । प्यारालाइसिस भएर शरीर चल्न छोडेपछि झागु चिसो भुईमा रोग सँग लडिरहेका छन् भने उनको श्रीमती पनि त्यहि चिसो भुईमा सुतिरहेका छन् । रोगले थला परेका झागुलाई छोराबुहारीले उपचार गर्न छोडेपछि उनको अवस्था झनझन नाजुक बन्दै गएको छ । उनी बोल्न त सक्छन् तर शरिरको कुनै भाग चल्दैन । दिसापिसाव समेत विस्तारामै हुन्छ । मर्नु न बाँच्नुको अवस्थामा रहेका झागुलाई उपचार गर्ने पैसा समेत छैन् । छोरा बुहारीले पालन पोषण र उपचार गर्न छोडेपछि उनको अवस्था अहिले निकै जटिल बन्दै गएको छ । ३ भाइ छोरा मध्ये १ भाइ लाटो छ भने २ भाइ छोरा अलग भएपछि घरमा अहिले झागुका दम्पती मात्र छन् ।
यसै बीच राप्ती गाउँपालिकामा रहेको आशाका किरण संस्थाले उक्त परिवारलाई सोमबार खाद्य सामाग्री सहयोग गरेको छ ।
राप्ती गाउँपालिका-५ सिसहनियाँ घर भई हाल डेनमार्कमा रहनु भएका प्रमोद अधिकारीले पठाएको ५ हजार रूपैयाँले चालम, दाल, नुन, तेल, जुस, साबुन, बिस्कुट र डाइभर लगायतका सामाग्री राप्ती गाउँपालिका वडा नम्बर ५ का वडा अध्यक्ष देवप्रसाद चाैधरीको रोहबरमा संस्थाका अध्यक्ष दिवस आचार्य र संस्थापक अध्यक्ष सुर्यकिरण केसीले पिडितकी श्रीमती लैहा चाैधरीलाई हस्तान्तरण गर्नु भएको हो । साथै स्वास्थ्यकर्मी समेत रहनु भएका संस्थाका संस्थापक अध्यक्ष सुर्यकिरण केसीले बिरामीको स्वास्थ्य चेकजाँच समेत गर्नु भएको थियो ।
सो अवसरमा संस्थाका महासचिव लोकमणी भुसाल, सचिव पवित्रा विश्वकर्मा, कोषाध्यक्ष ममता गिरी, सदस्य सिर्जना खड्का, प्रेस संयोजक ओमप्रकाश गुप्ता, शिक्षक तथा संस्थाका शुभचिन्तक ईश्वर केसी लगायतको उपस्थिति रहेको थियो । सहयोग गर्न चाहानु हुनेले झागु प्रसाद चाैधरीको नेपाल बैंकमा रहेको खाता नम्बर २९३१०२०७७१८२०९०००००१ मा सहयोग गर्न उनका श्रीमती लैहा चाैधरीले सवैमा अपिल समेत गर्नु भएको छ।
