राजावादीको प्रदर्शनमा गोली लागेका ७ जनाको उपचार हुँदै, एकको अवस्था चिन्ताजनक
काठमाडौँ १५ चैत । राजावादीको आन्दोलनका क्रममा शुक्रबार तीनकुनेमा प्रहरीसँगको झडपमा गोली लागी घाइते भएका ७ मध्ये ५ जनाको सिभिल अस्पतालमा र २ जनाको ट्रमा सेन्टरमा उपचार भइरहेको छ । सिभिलमा उपचार गराइरहेका पाँचै जनालाई रबरको गोली लागेको उपचारमा संलग्न चिकित्सकले दाबी गरेका छन् भने ट्रमामा उपचार गराइरहेका एक घाइतेलाई मेटलकै गोली लागेको बताइएको छ ।
ट्रमा सेन्टरका निर्देशक डा. बद्री रिजालका अनुसार गोली लागेका दुई घाइतेमध्ये २७ वर्षका एक पुरुषको पेटमा गोली लागेको छ भने अर्काको कुममा गोली लागेको छ । पेटमा गोली लागेका पुरुषको आकस्मिक शल्यक्रिया भइरहेको उनले बताए । पेटमा गोली लागेका एकको अवस्था चिन्ताजनक छ । यस्तै, कुममा गोली लागेका घाइतेको अवस्था भने स्थिर रहेको छ । मीन भवन स्थित सिभिल अस्पतालका निर्देशक डा. मोहनचन्द्र रेग्मीका अनुसार त्यहाँ गोली लागेका ५ जना घाइतेको आकस्मिक कक्षमा उपचार भइरहेको छ । ती मध्ये २२ वर्षीया एक महिलाको आकस्मिक शल्यक्रिया गर्ने तयारी गरिएको छ भने अन्यको अवस्था सामान्य छ । सबैको कम्मरमुनिको भागमा गोली लागेकाले अवस्था भने स्थिर रहेको उनले बताए ।
यस्तै सिनामंगलस्थित काठमाडौं मेडिकल कलेज (केएमसी) मा कुल ३९ जना घाइतेको उपचार गरिएको अस्पतालकी निर्देशक डा. मीना थापाले बताइन् । उनका अनुसार ३९ मध्ये १० जना सुरक्षाकर्मी रहेका छन् । त्यहाँ उपचाररत सबैको अवस्था स्थिर रहेको र अधिकांशलाई उपचार पछि डिस्चार्ज गरिएको पनि उनले बताइन् । प्रदर्शनकारीहरुले प्रहरीको बन्दुक नै खोसेको र सांघातिक आक्रमण गरेका दृश्य सामाजिक सञ्जालमार्फत सार्वजनिक भएको थियो । प्रदर्शनकारीले व्यक्तिका घर, पसल, सञ्चार गृह र सरकारी सम्पत्तिमा आगजनी गरेका थिए भने कोटेश्वरस्थित जडीबुटी उत्पादन तथा प्रशोधन कम्पनी लिमिटेडको कार्यालयमा आगजनी र कोटेश्वरस्थित भाटभटेनीमा तोडफोड र लुटपाट पनि गरेका थिए ।
काठमाडौंको तीनकुनेमा प्रहरीमाथि ढुंगामुढा र निजी घरहरूमाथि तोडफोड र आक्रमणपछि शुक्रबारका लागि तय भएको राजावादीको सभा बिथोलिएको छ । विभिन्न ठाउँबाट र्यालीसहित तीनकुने आएर सभामा परिणत हुने भनिए पनि पहिले नै भीड भड्किएको हो ।नवराज सुवेदी नेतृत्वको संयुक्त जनआन्दोलन समितिले व्यवसायीलाई दुर्गा प्रसाईंलाई आन्दोलनमा जनपरिचालनको जिम्मा दिएको छ । इकान्तिपुर डटकमबाट साभार
