राप्तीमा क्षयरोग कार्यक्रमको अर्धवार्षिक समीक्षा तथा कोहर्ट विश्लेषण कार्यक्रम सम्पन्न

आइतबार सम्पन्न कार्यक्रममा गाउँपालिका अध्यक्ष प्रकाश विष्टले रोगीको पहिचान र उपचारमा विशेष ध्यान दिन स्वास्थ्यकर्मीहरूलाई निर्देशन दिएका छन्। उनले टोलटोलमा स्वास्थ्यकर्मी तथा महिला स्वास्थ्य स्वयंसेविकाहरूको सक्रिय सहभागितामा क्षयरोगीको खोजी, पहिचान र उपचारलाई तीव्र बनाउनु पर्नेमा जोड दिएका छन् । अध्यक्ष विष्टले क्षयरोग एकदमै छिटो सर्ने भएकाले उपचार गर्नुभन्दा रोकथाममै प्राथमिकता दिनुपर्ने बताए । यसका लागि प्रभावकारी स्वास्थ्य शिक्षा आवश्यक रहेको उल्लेख गर्दै उनले समुदायस्तरमै जनचेतना फैलाउनुपर्नेमा जोड दिए। त्यस्तै उनले राप्ती गाउँपालिकामा “क्षयरोगमुक्त (टीबी-फ्री) कार्यक्रम” लागू गरिएको बताउँदै यस कार्यक्रमलाई प्रभावकारी बनाउन सबैको सहकार्य आवश्यक रहेको बताए। स्वास्थ्य शाखाका जनस्वास्थ्य निरीक्षक पदम प्रसाद पौडेलले गाउँपालिकामा क्षयरोगको अवस्था र रोग नियन्त्रणका लागि चालिएका कदमहरूको बारेमा प्रस्तुति दिए।

प्रतिक्रिया दिनुहोस्