राप्ती–३ मसुरीयामा हाट बजार सञ्चालन : किसानहरु खुसी

भालुवाङ १९ पुस । दाङको राप्ती गाउँपालिकामा पहिलो पटक कृषि हाट बजार सञ्चालनमा आएकाे छ । हाट बजार सञ्चालनमा आए सँगै किसानहरू समेत खुसी भएका छन्।

गाउँपालिकाको आयोजना तथा राप्ती कृषि हाट बजार व्यवस्थापन तथा सञ्चालन समितिको समन्वयमा हाटबजार सञ्चालन गरिएको हो।
राप्ती गाउँपालिका–३ मसुरीयादेखि उत्तरपट्टि रहेको सिरीचौर मैदानमा सञ्चालित हाटबजारमा ७५ किसानले आफ्नो उत्पादन बिक्रीका लागि राखेका थिए। किसानले तरकारी, फलफूल, कपडा, डल्कुशन, साबुन, हार्पिक, धूप,दुना टपरी र बाँसका सामग्रीहरू समेत प्रदर्शन तथा बिक्री गरेका थिए। राप्ती गाउँपालिकाका अध्यक्ष प्रकाश विष्टले शुक्रबार हाटबजारको औपचारिक उद्घाटन गर्दै अबदेखि प्रत्येक शुक्रबार हाटबजार सञ्चालन हुने जानकारी दिए। उनले हाटबजारले किसानहरूलाई उत्पादन बिक्री गर्न सहज बनाउने र बिचौलियाको चलखेललाई नियन्त्रण गर्ने विश्वास व्यक्त गरे। हाटबजार नहुँदा किसानले आफ्नो उत्पादन टोकरीमा राखेर घरघरमा बेच्नुपर्ने बाध्यता थियो।

अब, हाटबजारले किसानलाई उत्पादनको उचित मूल्य दिलाउन मद्दत पुर्‍याउनेछ, अध्यक्ष विष्टले बताए। साथै, उनले हाट बजारको व्यवस्थापनलाई दीर्घकालीन बनाउने विशेष योजना अगाडि सारिएको जानकारी दिए। पालिकाकी उपाध्यक्ष कमलापति चौधरीले हाटबजारले स्थानीय अर्थतन्त्रलाई चलायमान बनाउने र कृषकहरूलाई थप लगानी गर्न प्रोत्साहन दिने बताइन्। हाटबजारले उपभोक्ताहरूलाई गुणस्तरीय र सस्तो उत्पादन उपलब्ध गराउनेछ, उनले भनिन्।

वडा नम्बर ३ का अध्यक्ष उमेश अधिकारीले हाटबजारले स्थानीय स्तरमा रोजगारीको सृजना गर्ने र कृषिमा आधारित अर्थतन्त्रलाई बलियो बनाउन सहयोग पुर्‍याउने बताउनुभयो। राप्ती कृषि हाट बजार व्यवस्थापन समितिका अध्यक्ष दुर्योधन पाण्डेको अध्यक्षता तथा पालिका अध्यक्ष प्रकाश विष्टको प्रमुख आतिथ्यतामा सम्पन्न उद्घाटन कार्यक्रम पालिका उपाध्यक्ष कमलापती चौधरी, वडा नम्बर ३ का अध्यक्ष उमेश अधिकारी,हाट बजार व्यवस्थापन समितिका सचिव राजकुमार आर्चाय लगायतले शुभकामना मन्तव्य व्यक्त गर्नुभएको थियो ।भने कार्यक्रममा वडा नम्बर ४ का वडा अध्यक्ष वीर बहादुर चौधरी,५ का अध्यक्ष देव प्रसाद चौधरी,राजधानी जग्गा एकीकरण आयोजनाका अध्यक्ष श्यमेस चौधरी लगायतअन्य जनप्रतिनिधि, समाजसेवी, बुद्धिजीवी र किसानहरूको उल्लेख्य उपस्थिति रहेको थियो।

कृषि विकास शाखा प्रमुख बरसाती गडरियाले स्वागत मन्तव्य बाट सुरु भएको कार्यक्रमको सहजीकरण आर्थिक विकास शाखा प्रमुख दामोदर आचार्यले गरे। हाटबजारको नियमित सञ्चालनले स्थानीय उत्पादनलाई प्रोत्साहन गर्दै आत्मनिर्भर अर्थतन्त्र निर्माणमा महत्त्वपूर्ण योगदान पुग्ने विश्वास व्यक्त गरिएको छ।