कांग्रेस लुम्बिनी सम्मेलनमा उठ्यो हिन्दू राष्ट्रको माग
बुटवल १८ मसिर । नेपाली कांग्रेस लुम्बिनीले तहगत संरचनालाई जिम्मेवारी दिन र हस्तक्षेप नगर्न केन्द्रलाई आग्रह गरेको छ । बुटवलमा सम्पन्न दुई दिने सम्मेलन पार्टी केन्द्रलाई तहगत संरचनालाई पूर्ण रुपमा जिम्मेवारी दिन पार्टीको केन्द्रसँग आग्रह गर्दै सकिएको हो ।
कांग्रेस प्रदेश सभापति अमरसिंह पुनले संघीय संरचनाअनुसार पार्टीलाई पनि चलायमान बनाउन केन्द्रलाई आग्रह गर्ने निर्णय गरिएको बताए । ‘प्रदेश सरकारलाई प्रदेश समितिले निर्देशन गर्ने जिम्मेवारी दिनुपर्छ । केन्द्रले हस्तक्षेपकारी भूमिका निर्वाह नगर्न पनि आग्रह गर्छौं’, उनले भने, ‘संघीय लोकतान्त्रिक गणतन्त्रअनुसार हाम्रो पार्टीको संरचनालाई पनि चलायमान बनाउनुपर्यो । स्थानीय नेता तथा कार्यकर्तालाई क्रियाशील बनाउने र निर्देशन गर्ने काम पार्टीको स्थानीय समितिले गर्नुपर्छ ।’
मुलुकको विकास र समृद्धिको लागि अरु पार्टीसँग पनि समन्वयकारी भूमिका खेल्नुपर्ने भन्दै प्रदेश सम्मेलनले अन्तरपार्टी सञ्जाल बनाएर सबै पार्टीसँग समन्वय सहकार्य गर्ने गर्ने निर्णय गरेको छ । संघदेखि वडा संरचनासम्म अरु पार्टीसँग समन्वय गर्न लुज फोरम बनाउनुपर्ने प्रदेश सभापति पुनले बताए ।
कांग्रेसको क्रियाशीलताको लागि सबै पालिका सभापतिलाई पदेन महाधिवेशन प्रतिनिधि तथा महासमिति सदस्य बनाउन पनि कांग्रेस लुम्बिनीले आग्रह गरेको छ ।
पार्टीमा एक पटक केन्द्रीय सदस्य भएकाहरु पनि तल्लो तहबाट स्वतः प्रतिनिधि बन्ने व्यवस्था खारेज गर्न, सबैले तलैदेखि लडेर आउनुपर्ने कांग्रेस लुम्बिनीले प्रस्ताव गरेको छ ।
शनिबार सुरु भएर आइतबार भएको बन्दसत्रमा प्रदेश उपसभापति भुवनप्रसाद श्रेष्ठले प्रस्तुत गरेको राजनीतिक प्रतिवेदन, प्रदेश महामन्त्री सुरेन्द्रराज आचार्यद्वारा प्रस्तुत सांगठनिक प्रतिवेदन र कोषाध्यक्ष प्रकाश रानाद्वारा प्रस्तुत प्रतिवेदनमाथि ४ वटा समूह बनाएर छलफल गरिएको थियो ।
समूहगत छलफलमा पार्टीको आन्तरिक गतिविधिसँगै मुलुकका समस्याका बारेमा पनि प्रतिनिधिहरुले सुझाव दिएका थिए । समूहगत छलफलका सुझावहरु समूहका नेताहरुले बन्दसत्रमा पेश गरेका थिए । प्राप्त सुझावलाई समेटिने गरी प्रस्तुत प्रतिवेदनहरु पारित गरिएको थियो ।
सम्मेलनमा सहभागी अधिकांश प्रतिनिधिले पार्टीले हिन्दू राज्यको पक्षमा निर्णय लिन सुझाव दिएका छन् । तर, यसलाई संस्थागत निर्णय भने गरिएको छैन । कांग्रेस सभापति शेरबहादुर देउवा स्वयंले पनि केही दिनअघि अहिलेको व्यवस्थाको विरुद्ध अन्य विकल्प सोच्न पनि नसकिने तर हिन्दू धर्मको विषयमा सकारात्मक हुन सकिने आशय व्यक्त गरेका थिए ।
सम्मेलनमा अब हिन्दू धर्मका विषयमा तत्काल निर्णय गर्न नसके पार्टी कमजोर हुने सुझाव आफूहरुले दिएको प्रतिनिधि लोकेन्द्र विश्वकर्माले बताए ।
