विराटनगरकाे क्षयरोग निवारण संस्थामा उपचाररत दुई जना कैदीबन्दी फरार

विराटनगर १५ असोज । क्षयरोग निवारण संस्थामा उपचाररत दुई जना कैदीबन्दी फरार भएका छन् ।  उपचारका लागि क्षयरोग निवारण संस्था विराटनगरमा भर्ना भएका कैदी राजकुमार हेमरम र बन्दी मञ्जिल गुरुङ फरार भएका हुन् ।

दुवै जना जिल्ला कारागार झापामा थिए । क्षयरोग देखिएपछि विराटनगरस्थित उक्त संस्थामा भर्ना गरिएको थियो । क्षयरोग लागेपछि उनीहरु भदौ र असारबाट निवारण संस्थामा भर्ना भएका थिए । जिल्ला कारागार मोरङका निमित्त जेलर तुलसीराम भगतका अनुसार उपचारका क्रममा उनीहरु शनिबार विहान सबेरै फरार भएका हुन् ।

उपचारका क्रममा फरार भएका कैदीबन्दीको खोजी भइरहेको जिल्ला प्रहरी कार्यालय मोरङले जनाएको छ । मोरङका प्रहरी उपरीक्षक शान्तिराज कोइरालाले फरार भएका कैदीबन्दीको खोजी तिब्र बनाइएको बताए । उनले सुरक्षामा खटिएका प्रहरीमाथि पनि छानबिन भइरहेको बताए । ‘फरार भएकाहरुको खोजीकार्य जारी छ’, उनले भने, ‘ड्युटीमा लापरवाही देखिएकाले आन्तरिक छानबिन पनि गरिरहेका छौं ।’