यसवर्ष नेपालको आर्थिक वृद्धिदर ५ दशमलव ८ प्रतिशत हुने एडीबीको प्रक्षेपण
काठमाण्डाै ६ असाेज । एसियाली विकास बैङ्क (एडीबी) ले सन् २०२२ मा नेपालको आर्थिक वृद्धिदर ५ दशमलव ८ प्रतिशत हुने संशोधित अनुमान गरेको छ । यसअघि एडीबीले यस वर्षका लागि ३ दशमलव ९ प्रतिशतको आर्थिक वृद्धि हुने प्रक्षेपण गरेको थियो ।
तर सन् २०२३ का लागि एडीबीले आर्थिक वृद्धिदर घटाएको छ । यसअघि नेपालको आर्थिक वृद्धिदर ५ प्रतिशत रहने अनुमान गरेको एडीबीले एसियन डेभलपमेन्ट आउटलुक, २०२२ को अद्यावधिक प्रतिवेदन सार्वजनिक गर्दै सन् २०२३ मा नेपालको आर्थिक वृद्धिदर ४ दशमलव ७ प्रतिशत पुग्ने प्रक्षेपण गरेको हो ।
एडीबीले विदेशी विनिमय सञ्चितिमा आएको गिरावट, मुद्रास्फीति, आयात प्रतिबन्धजस्ता कारणले सन् २०२३ मा नेपालको वृद्धिदर केही घट्ने प्रक्षेपण गरेको जनाएको छ । मुद्रास्फीति भने सामान्य घट्ने प्रतिवेदनमा उल्लेख छ । जसअनुसार सन् २०२२ मा ६ दशमलव ३ प्रतिशत र २०२३ मा ६ दशमलव १ प्रतिशत पुग्ने अनुमान गरिएको छ ।
खासगरी कडा मौद्रिक नीति, सामान्य किसिमको कृषि उत्पादन, खानेतेलको मूल्य घटेको र भारतमा समेत मुद्रास्फीतिमा सामान्य गिरावट आएकाले चालु आर्थिक वर्षमा मुद्रास्फीति थोरै भए पनि घट्ने अपेक्षा गरिएको छ ।
मलको निरन्तर अभावले धान उत्पादनमा प्रतिकूल असर पार्न सक्ने अद्यावधिक प्रतिवेदनमा उल्लेख छ । त्यस्तै जलविद्युतको बढ्दो उत्पादन र उद्योगको क्षमता उपयोगमा भने वृद्धि हुने अनुमान छ ।
घरजग्गा, थोक तथा खुद्रा व्यापार गतिविधिमा आएको सुस्तताले सेवा क्षेत्रको वृद्धि मध्यम हुने अनुमान छ । वस्तु आयातमा भएको कमी र स्थिर विप्रेषण आप्रवाहले गर्दा चालु खाता घाटा कुल गार्हस्थ्य उत्पादनको ८ दशमलव १ प्रतिशतमा सीमित हुने अनुमान गरिएको छ ।
नेपालका लागि एडीबीका राष्ट्रिय निर्देशक आर्नोड क्वाँसाले आयातमा थप प्रतिबन्ध लगाइएमा र स्वास्थ्य प्रणालीलाई समस्या ल्याउने डेङ्गी सङ्क्रमण, प्राकृतिक प्रकोप, भू–राजनीतिक उथलपुथलमा हुन सक्ने वृद्धिले भने आर्थिक वृद्धिको सम्भावनालाई कम गर्न सक्ने बताए ।
