खाडी र मलेसियामा ५४५ जना नेपाली श्रमिक जेलमा, २५ जनालाई मृत्यु दण्डको सजाय

काठमाण्डौ १ भदाै । वैदेशिक रोजगारीका लागि खाडीका ६ देश र मलेसिया गएका ५४५ जना नेपाली त्यहीको जेलमा थुनिएका छन् । वैदेशिक रोजगार बोर्डको पछिल्लो तथ्याङ्क अनुसार विभिन्न मुद्दामा ५४५ नेपाली श्रमिक जेल परेका हुन्। जेलमा ५ सय २६ जना पुरुष र १९ जना महिला रहेका छन् ।

जेलमा रहेका नेपाली मध्ये २५ जनालाई त मृत्यु दण्डको सजाय सुनाइएको छ । बोर्डका अनुसार कुवेतमा ३ जनालाई यूएईमा १ जनालाई, मलेसियामा १६ जनालाई र साउदी अरबमा पाँच जना नेपाली श्रमिकलाई मृत्युदण्डको सजाय सुनाइएको छ ।

१६ जनालाई भने आजीवन कारावासको सजाय तोकिएको छ । कुवेतमा ९ जनालाई, यूएईमा ४ जनालाई र कतारमा  ३ जनालाई आजीवन कारावासको सजाय तोकिएको बोर्डको तथ्याङ्कमा उल्लेख छ ।

बहराइनमा २ जना नेपालीलाई २५ वर्षको जेल सजाय तोकिएको छ भने कुवेत, कतार र बहराइनमा एक एक जनालाई १५ वर्षको जेल सजाय भएको छ । ३६ जना नेपालीहरूलाई १५ वर्षभन्दा कम जेल सजाय तोकिएको छ ।  कुवेतमा ३१, यूएईमा ४ र बहराइनमा १ गरी ३६ जना नेपाली १५ वर्षभन्दा कमको जेल सजाय भोगिरहेका छन् ।

यस्तै २९ जनालाई १० वर्षभन्दा कम, १ जना पाँच वर्षभन्दा कम, ४४ जनालाई  एक वर्षभन्दा कम, ७५ जनालाई तीन महिनाभन्दा कमको जेल सजाय तोकिएको छ । २ सय ९३ जनाको सजाय तोक्न बाँकी रहेको र १८ जनालाई जरिवाना तोकिएको बोर्डले जनाएको छ ।

कुन देशमा कति 

वैदेशिक रोजगार बोर्डका अनुसार खाडीको देश कुवेतमा ३ जना महिला र ५५ जना पुरुष गरी ५८ जना,  यूएईमा १२ जना महिला र १७३ जना पुरुष गरी १ सय ८५ जना, ओमानमा २ जना महिला र १ जना पुरुष गरी ३ जना, साउदीमा ५४ जना, कतारमा ३५ जना र बहराइनमा ५ जना रहेका छन्  । मलेसियामा २ जना महिला र २०३ जना पुरुष गरी २०५ जना जेलामा रहेका छन् ।