दाङमा १८९ जना संक्रिय कोरोना संक्रमित, सबैभन्दा धेरै घोराहीमा, दुई पालिका कोरोना मुक्त

देउखुरी टुडेकर्मी, भालुवाङ २२ असाेज । 

दाङमा १ सय ८९ जना सक्रिय कोरोना संक्रमित रहेका छन् । हिजो सोमबारसम्म १ हजार २ सय ३२ जनामा कोरोना पोजेटिभ देखिएकोमा १ हजार ४१ जना निकोभएसँगै अहिले जिल्लामा सक्रिय संक्रमितको संख्या १ सय ८९ जना रहेका छन् । स्वस्थ्य कार्यालय दाङका अनुसार सोमबार मात्र दाङका २८ जनामा कोरोना पोजेटिभ देखिएको थियो ।

स्वस्थ्य कार्यालयका फोकल पर्सन कमल चन्दका अनुसार सोमबार १६ जना संक्रमित निको भएर घर फर्किएका थिए । अहिलेसम्म संक्रमित मध्ये धेरै पुरुषको संख्या रहेको छ । १ हजार २ सय ३२ मा संक्रमण पुष्टि भएकोमा ९ सय ६४ जना पुरुष रहेका छन् भने २ सय ६८ जना महिला रहेका छन् । संक्रमित मध्ये ३ जनाको मृत्यु भएको छ । जिल्लामा अहिलेसम्म १७ हजार ४ सय ३ जनाको स्वाब संकलन भएको छ ।

यसैबीच संक्रिय संक्रमित मध्ये सबैभन्दा धेरै घोराही उपमहानगरपालिकामा रहेका छन् । फोकल पर्सन चन्दका अनुसार १ सय ८९ जना सक्रिय कोरोना संक्रमित मध्ये घोराहीमा मात्र ६३ जना रहेका छन् । त्यसपछि लमही नगरपालिकामा ६१ जना, तुलसीपुर उपमहानगरपालिकामा ४५ जना, शान्तिनगर गाउँपालिकामा ११ जना रहेका छन् । त्यस्तै गढवा र बंगलाचुली गाउँपालिकामा एक/एक जना, राजपुर गाउँपालिकामा २ जना, राप्ती गाउँपालिकामा ५ जना छन् भने बबई र दंगीशरणमा गाउँपालिकामा संक्रिय संक्रमितको सख्ंया रहेका छैनन् ।

त्यसैगरी अहिलेसम्म संक्रमित हुनेहरुमा उमेर अनुसार हेर्ने हो भने २० देखि ४० वर्ष उमेर समूहका मानिस धेरै रहेका छन् । स्वस्थ्य कार्यालय दाङका फोकल पर्सन कमल चन्दले अध्यावधिक गरेको विवरण अनु्सार उक्त समूह भित्रका संक्रमित ७ सय ९२ जना रहेका छन् भने सबै भन्दा कम संक्रमित ५ वर्ष भन्दा कमका १३ जना रहेका छन् । त्यसपछि १० देखि २० वर्ष उमेर समूहका मानिस संक्रमित भएका छन् । उक्त समूहका दाङमा १ सय ९५ जना संक्रमित भएका छन् । ४० देखि ५० वर्ष उमेर समूह भित्र १ सय ३२ जना, ५० देखि ६० वर्ष उमेर समूहका ७२ जना, ६० वर्ष भन्दा माथि र ५ देखि १० वर्ष उमेर समूहका १४/१४ जना संक्रमित भएका छन् ।

यस्तै पेशा अनुसार संक्रमण हुनेमा दाङमा कर्मचारी धेरै हरेका छन् । चन्दका अनुसार जिल्लामा ४३ जना कर्मचारीमा कोरोना पुष्टि भएको छ। त्यसपछि स्वास्थ्य कर्मी ४०, नेपाल आर्मी ३४, जनाप्रतिनिधि ७, नेपाल प्रहरी १, महिला स्वास्थ्य स्वयम् सेवीका २ र संचारकर्मी १ जना रहेका छन् ।