पञ्चायत कालमा रुख राेप्दा टाउकाे फुटाइन्थे, कम्युनिस्ट सरकारमा पुल बनाउँदा करङ भाँचिँदैछन् : रामचन्द्र पाैडेल
काठमाण्डाै २९ मंसिर ।
नेपाली कांग्रेसका वरिष्ठ नेता रामचन्द्र पौडेलले सङ्घीय लोकतान्त्रिक गणतन्त्रको मर्ममाथि सरकारले नै प्रहार गरिरहेको बताएका छन् । सरकारको विरोधमा कांग्रेसले काठमाण्डौमा गरेको प्रदर्शनलाई सम्बोधन गर्दै वरिष्ठ नेता पौडेलले लोकतन्त्रमाथि सरकारले नै पहिलो प्रहार गरेको बताए ।
वरिष्ठ नेता पौडेलले लोकतान्त्रिक व्यवस्थाका सञ्चालकहरू नै लोकतन्त्रवादी नभएकाले नागरिकले दुःख पाइरहेको बताए । अलोकतान्त्रवादीहरूले सरकार चलाइरहेकाले लोकतन्त्र सङ्कटमा पार्न खोजिएको बताए । तर नेपाली कांग्रेस रहँदासम्म लोकतन्त्रलाई सङ्कटमा पार्न नदिने समेत वरिष्ठ नेता पौडेलले बताउनुभयो । उनले भने, ‘देशमा यत्रो ठूलो सङ्घर्ष गरेर आएको लोकतान्त्रिक व्यवस्था छ तर यो लोकतान्त्रिक व्यवस्थाका सञ्चालकहरू लाेकतन्त्रवादी छैनन् । यिनको दर्शन, यिनको सिद्धान्त, यिनको पृष्ठभूमि नै लोकतन्त्रवादी छैन, अलोकतन्त्रवादी छ । जसले गर्दा आज लोकतन्त्र सङ्कटमा पार्न खोजिँदै छ ।’
वरिष्ठ नेता पौडेलले राजाको निर्दलीय पञ्चायतमा रुख रोप्दा टाउको फुटाउने गरेको स्मरण गर्दै अहिलेका कम्युनिस्टहरूले पुल बनाउँदा करङ भाँचिदिएको बताए । उनले राजा र कम्युनिस्ट एक सिक्काका दुई पाटा भएको टिप्पणीसमेत गरे । उनले भने, ‘राजाको निर्दलीय पञ्चायतको बेला हामीले रुख रोप्दा हाम्रा टाउका फुटाइन्थे, आज कम्युनिस्टकाे सर्वसत्तावादमा हामीले पुल बनाउँदा हाम्रा करङ भाँचिँदैछन् । यो एउटा विडम्बना हो । यो एउटै सिक्काका दुई पाटा हुन् । अधिनायकवादका दुई वटा स्वरूप हुन्, चाहे जुनसुकै नाममा आओस् । प्रवृत्ति उही हो । मनोवृत्ति उही हो । सबै सत्ता आफ्नो हातमा लिएर आफै मोज गर्ने, आफ्नो हात जगन्नाथ गर्ने, आफ्ना मान्छे पोस्ने, आफ्नै वर्ग खडा गर्ने वा वर्ग जन्माउने फेरि यो देशमा अभ्यास भइरहेको छ ।’
देशमा भ्रष्टाचार, असुरक्षा र पक्षपात बढेको पनि वरिष्ठ नेता पौडेलले बताए । राज्यको ढुकुटी मासेर पालिका र प्रदेश सरकारको अधिकार खोसेर आफ्ना कार्यकर्तालाई पोस्ने काम भएको पनि उनले बताए । भ्रष्टाचार सरकार डुबिसकेको पनि वरिष्ठ नेता पौडेलले बताए । कम्युनिस्ट पार्टीकै बहुमत नेताहरूले नै सरकार भ्रष्टाचारमा डुबिसकेको बताइसकेकाले अरू भन्नुपर्ने कुरै नभएको पनि उहाँले बताए । सरकारले सत्ताको दुरुपयोग गरिरहेको आरोप छ ।
७० वर्षसम्म नागरिकले लडेर ल्याएको संविधान र सपूतहरूको अथक प्रयासबाट कायम भएको व्यवस्था खलबल्याउने काम भएको पनि पाैडेलले भने। सरकार कम्युनिस्ट पार्टीको भए पनि देश कम्युनिस्ट नभएको भन्दै सरकारले देशलाई कम्युनिजम बनाउने दुस्साहस गरिरहेको उनकाे भनाइ छ । उनले भने, ‘सरकार कम्युनिस्ट पार्टीको होला तर देश कम्युनिजम होइन । देश साम्यवादी होइन । कम्युनिस्टको सरकार होला, कम्युनिस्ट पार्टीको होला तर राज्य कम्युनिस्ट होइन । तर राज्यलाई नै कम्युनिस्ट बनाउने दुस्साहस आज यिनीहरूले गर्न गइरहेका छन् ।’
अहिले देश पूर्णरूपमा असफलतातिर गइरहेको र त्यसको हिसाब अवको चुनावमा नागरिकसँग माग्ने पनि वरिष्ठ नेता पौडेलले बताए । उनले भने, ‘यो सरकार पूर्णरूपमा असफलतातिर गइरहेको र हामी त्यसको हिसाब आउँदो चुनावमा नागरिककाेमा गएर माग्छौँ । हामी लोकतन्त्रवादी हौँ । अहिल्यै हामी सरकार फाल भनिरहेका छैनौँ । सरकार जान्छ भने उनकै अन्तरद्वन्द्वले जान्छ । हामीलाई लेनादेना केही पनि छैन तर हामी यसको हिसाब छोड्नेवाला छैनौँ ।’
वरिष्ठ नेता पौडेलले नेपाली कांग्रेसबाट कुनै कमी कमोजरी भएमा सुधार गरी सच्याएर अगाडि बढ्न चाहेको पनि प्रष्ट पारे ।
