दाङकाे गढवा गाउँपालिकामा लघु उद्यमीहरूलाई प्रविधि हस्तान्तरण

गढवा२१ असार । दाङकाे गढवामा “आर्थिक सहयोगको आधार, लघु उद्यममार्फत रोजगार” भन्ने मूल नाराका साथ  गरिबी निवारणका लागि लघु उद्यम विकास कार्यक्रम अन्तर्गत प्रविधि हस्तान्तरण कार्यक्रम सम्पन्न भएको छ। गढवा गाउँपालिका उद्यम विकास शाखाको आयोजनामा भएको कार्यक्रममा लघु उद्यमीहरूलाई उनीहरूको व्यवसाय अनुकूल उपकरणहरू वितरण गरिएको हो।

गढवा गाउँपालिका वडा नं. ८ का ४ जना उद्यमीहरूलाई होटल व्यवसायका लागि डी–फ्रिजर, माईक्रोभन, ग्यास चुलो र मिक्सर प्रदान गरिएको छ। त्यस्तै वडा नं. ४ र ५ का एक–एक जना महिला उद्यमीहरूलाई सिलाई कटाई व्यवसाय सञ्चालनका लागि विद्युतीय सिलाई मेसिन हस्तान्तरण गरिएको हो।

यसैगरी, वडा नं. १ मा रहेको सयपत्री दुना–टपरी समूहका सदस्यहरूलाई पात टिप्न सहज होस् भनेर भर्याङ समेत प्रदान गरिएको छ।कार्यक्रमको अध्यक्षता गढवा गाउँपालिका उपाध्यक्ष शारदाकुमारी चौधरीले गरेकी थिडन्। कार्यक्रममा प्रशासन शाखा प्रमुख पुनराम शर्माले प्रविधिको प्रयोगबाट व्यावसायिक उत्पादन वृद्धि भई आत्मनिर्भर बन्न सहयोग पुग्ने बताए।

कार्यक्रममा बोल्दै उपाध्यक्ष शारदाकुमारी चौधरीले गढवा गाउँपालिकाले उद्यमशील महिलाहरूलाई सीप, प्रविधि र प्रेरणा दिन निरन्तरता दिइरहेको बताउँदै, उपलब्ध प्रविधिको सही सदुपयोग गर्दै व्यवसायिक उत्पादनमा लाग्न सहभागीहरूलाई आग्रह गरिन्। उनले केही महिनापछि कार्यक्रमको प्रभावको अनुगमन गरिने समेत जानकारी दिइन्। कार्यक्रमको सञ्चालन गढवा गाउँपालिका उद्यम विकास शाखाकी सहजकर्ता बिनो भुजेलले गरेकी थिइन्।