कर्णाली प्रदेशका मुख्यमन्त्री शर्माद्वारा राजीनामा
काठमाण्डाै २१ चैत । कर्णाली प्रदेशका मुख्यमन्त्री राजकुमार शर्माले राजीनामा दिएका छन् । आज बसेको प्रदेश सभा बैठकलाई सम्बोधन गर्दै उनले राजीनामाको घोषणा गरेका हुन् ।
राजीनामाको घोषणा गर्नुअघि शर्माले आफू नेतृत्वको सरकारले गरेका कामको फेहरिस्त प्रस्तुत गरेका थिए । उनले राजीनामा दिएसँगै मुख्यमन्त्रीले विश्वासको मत लिने कारबाही अघि नबढ्ने भएको छ । यससँगै कर्णाली प्रदेश सभाको बैठक चैत २५ गते आइतवारसम्मका लागि स्थगित भएको छ । केन्द्रमा नयाँ सत्ता समीकरणसँगै पाँच दलका शीर्ष नेताबीच कोशी, गण्डकी र कर्णाली एमालेले, बाग्मती र लुम्बिनी माओवादीले, सुदूरपश्चिम एकीकृत समाजवादीले र मधेशमा जसपाले नेतृत्व गर्ने समझदारी छ ।
कर्णालीमा माओवादी केन्द्रले सरकारको नेतृत्व गर्दै आएकोमा सहमतिअनुसार प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डले कर्णाली सरकारको नेतृत्व एमालेलाई छोडेर आवश्यक सहयोग गर्न निर्देशन दिएका थिए ।
