लुम्बिनीमा मुख्यमन्त्री गिरीको सरकार ढल्यो, पक्षमा ३३ र विपक्षमा ५३ मत
भालुवाङ ११ वैशाख । लुम्बिनी प्रदेशका मुख्यमन्त्री लिला गिरीको सरकार ढलेको छ ।
आज दाेस्राे पटक विश्वासको मत लिने क्रममा मुख्यमन्त्री गिरीले विश्वासको मत नपाए पछि सरकार ढलेको हो । यस अघि सात दलकाे समर्थनमा मुख्यमन्त्री बनेका गिरीलाई माओवादी लगायतका दलले दिएकाे समर्थन फिर्ता लिएपछि उनी अल्पमतमा परेका थिए । गत चैत १२ मा विश्वासकाे मत फिर्ता लिएका थिए । सरकार बनेको १०३ दिनमा मुख्यमन्त्री गिरी नेतृत्वको लुम्बिनी प्रदेश सरकार ढलेकाे छ । पुस २७ गते गिरी मुख्यमन्त्रीमा नियुक्त भएका थिए ।
साेमवार लिएको विश्वासकाे मतमा कुल ८७ सदस्य मध्ये गिरीकाे पक्षमा ३३ र विपक्षमा ५३ मत खसेकाे थियो । मत विभाजन पछि सभामुख तुलाराम घर्तीले मुख्यमन्त्री लिला गिरीले विश्वासकाे मत प्राप्त गर्न नसकेकाे संसदलाई जानकारी गराएका छन ।
सत्ता साझेदार दलहरुले समर्थन फिर्ता लिएपछी सरकार बनेको ७४ दिनमै अल्पमतमा परेको थियो । संविधानको धारा १६८ को २ बमोजिम बनेको सरकार ढलेकाे हाे । ८७ सांसद मध्य लुम्बिनीमा बहुमतका लागि ४४ मत चाहिन्छ । लुम्बिनीमा एमालेका २९ र राप्रपाका ४ सांसद मात्रै पक्षमा मतदान गरेका छन । बाँकी नेपाली कांग्रेस २७, नेकपा माअाेवादी ११, नागरिक उन्मुक्ति पार्टी ४, जसपा, लाेसपा, जनमत ३/३, राष्ट्रिय जनमाेर्चा र एकीकृत समाजवादी १/१, स्वतन्त्र १ गरि ५३ जना सांसदले विपक्षमा मतदान गरेका छन ।
लुम्बिनीमा कांग्रेसका डिल्ली चौधरीलाई मुख्यमन्त्री बनाउन माग गर्दै विभिन्न ८ दलका ५३ सांसदले प्रदेश प्रमुखलाई हस्ताक्षर बुझाइसकेका थिए । एमालेले भने विश्वासको मत नपाएमा ठूलो दलका हिसाबले सरकारको नेतृत्व दावी गर्ने तयारी गरेको छ ।
एमाले संसदीय दलको बैठकमा संसदमा विश्वासको मत लिने र संविधानको धारा १६८ को ३ बमोजिम सरकार गठनको लागी पहल लिने बारेमा समेत छलफल गरेको छ । नेपाली कांग्रेस लगायत ८ राजनीतिदलले संविधानकाे १६८ काे उपधारा २ बमाेजिम सरकार गठन हुनुपर्ने दावी गर्दै आएकाे छ ।
