लैंगिक हिंसा बिरुद्धको १६ दिने अभियानलाई गढवाले औपचारिक, लमहीले सञ्चार माध्यमको प्रयोग गर्दा राप्तीको कार्यक्रम अन्यौलमा
शिबराज पन्थी, गढवा ९ मंसिर ।
देउखुरीको गढवा गाउँपालिकाले लैंगिक हिंसा अन्त्यको प्रतिबद्धता, ब्यक्ति समाज र सबैको ऐक्यबद्धता भन्ने यसबर्षको मुल नाराकासाथ मंसिर १० गतेबाट देशब्यापि रुपमा सुरु हुन थालेको लैंगिक हिंसा बिरुद्धको १६ दिने अभियानको कार्यक्रम तयगरि सार्वजनिक गरेको छ । गाउँपालिकाका अध्यक्ष सहजराम यादवको अध्यक्षतामा उपाध्यक्ष शान्ती चौधरी, महिला जनप्रतिनिधीहरु र सरोकारवाला संघसंस्थाको संयुक्त बैठकबाट ११ दिने कार्यक्रम तय गरिएको गाउँपालिकाले जनाएको छ ।
जस अनुसार कोभिड-१९ को साबधानी अपनाउदै मंसिर १० गते गढवा बजारमा र्याली सहितको प्रदर्शन गरिने भएको छ भने १२ गतेदेखि सबै वडाहरुमा अभिमुखिकरण सचेतना सुरु गरिने भएको उपाध्यक्ष शान्ती चौधरीले जानकारी दिइन् । तय भएको कार्यक्रम अनुसार वडा नं. ६ को खबरीखुटीमा मंसिर १२ गते, वडा नं. २ को चिमचिमेमा मंसिर १३ गते, वडा नं. ३ को माधवपुरमा मंसिर १४ गते, वडा नं. ४ को पर्सेनीमा मंसिर १५ गते र वडा नं. ५ को जमुनीबासमा मंसिर २० गते अभिमुखिकरण कार्यक्रम गरिने भएको छ ।
त्यसै गरि वडा नं. १ को रङसिङमा मंसिर १८ गते, वडा नं. ७ को चन्दनपुरमा मंसिर १७ गते र वडानं. ८ कोइलाबासमा मंसिर १६ गते वडा स्तरका कार्यक्रमहरु गरिने भएको छ । जसका लागि क्रमशः मधा न्यौपाने, सनि केसी, चञ्चला चौधरी, कमला आचार्य, जया बिश्वकर्मा, मिना गुरुङ, मिना चौधरी र बिष्णुदेवी कुवरलाई वडागत इन्चार्ज तोकिएको बैठकपछि महिला तथा बालबालिका शाखा हेर्ने कर्मचारी सुरेश पौडेलले जानकारी दिएका छन् । बैठकमा स्थानीय जनप्रतिनिधि, संघसंस्था एवं अन्य सरोकारवाला निकायका प्रतिनिधीहरुको उपस्थिति रहेको थियो ।
यसै बिच लमही नगरपालिकाले यस बर्षको लैङगिक हिंसा बिरुद्धको १६ दिने अभियान संचार प्रबिधिको माध्यमबाट मनाउने भएको छ । कोरोना भाईरसको उच्च जोखिमलाई मध्यनजर गर्दै नगरपालिकाले यो बर्षको १६ दिने अभियानको क्रममा ठुला र्याली, जुलुश नगरि समाजमा हुने लैङगिक हिंसाको रोकथाम र नियन्त्रणका लागी प्रबिधिको प्रयोग गरि जनचेतनामुलक सन्देशहरु स्थानीय स्तर सम्म पुर्याउने गरि स्थानिय रेडियो, टेलिभिजन र पत्रपत्रिका मार्फत लैङगिक हिँसा बिरुद्धको जानकारी मुलक सन्देशहरु प्रसारण गर्ने निणर्य गरिएको छ ।
त्यसका साथै नगरपालिकाका ९ वटै वडाहरुका सबै गाउँमा माईकिङ मार्फत पनि लैङगिक हिसाको बिरुद्धमा जानकारीमुलक सन्देश प्रवाह गरि जागरुक गराउने भएको छ ।
लमही नगरपालिकाका प्रमुख कुल बहादुर केसिको अध्यक्षतामा बैठक सम्पन्न भएको थियो । बैठकले कार्यक्रम सम्पन्न गर्नका लागी लमही नगरपालिकाका उप प्रमुख देबका बेलबासेको सयोजकत्वमा बिभिन्न सरोकारवाला निकायका महिलाहरु सहितको समिति गठन गरेको छ । प्रत्येक बर्ष नोभेम्बर २५ देखि डिसेम्बर १० तारिख सम्म मनाईने महिला हिँसा बिरुद्धको १६ दिने अभियान बिभिन्न कार्यक्रम गरेर मनाउने गरिन्छ । यो बर्ष “लैङगिक हिँसा अन्त्यको प्रतिबद्धता, ब्यक्ती समाज र समुदायको एक्यबद्धता” भन्ने राष्ट्रिय नारा तय गरिएको छ ।
यता राप्ती गाउँपालिकाले कार्यक्रम गर्ने वा नगर्ने भन्ने विषयमा अन्यौल रहेको महिला तथा बालबालिका शाखा प्रमुख जिवनकुमारी जिसीले जानकारी दिएकी छिन् । गाउँपालिका उपाध्यक्ष जिल्ला बाहिर रहेको र आफु विरामी भएको भन्दै कार्यक्रमको टुंगो नलागेको शाखा प्रमुख जिसीले बताएकी छिन् ।
