वडाबाटै राष्ट्रिय परिचयपत्र बनाउन पाउँदा राप्ती गाउँपालिकाका नागरिकहरू उत्साहित

भालुवाङ २१ पुस । दाङको राप्ती गाउँपालिका क्षेत्रका नागरिकहरू वडा तहबाटै राष्ट्रिय परिचयपत्र बनाउन पाउँदा निकै उत्साहित भएका छन् ।गाउँपालिकाले नागरिकहरूको सहजताका लागि वडा तथा टोलबाट राष्ट्रिय परिचयपत्र बनाउने अभियान सुरू गरेपछि नागरिकहरू निकै उत्साहित भएका हुन् । राष्ट्रिय परिचयपत्र बनाउने अभियान हालका लागि राप्ती गाउँपालिकाको वडा नम्बर १, २, ४, ६, ७, ८ र ९ मा सुरु गरिएको छ । जस अनुसार वडा नम्बर २ मा बुधबार देखि र ३ र ५ वाहेक अन्य वडामा बिहीबार देखि राष्ट्रिय परिचयपत्र बनाउने अभियान सुरूवात गरिएको छ । बिहीबार वडा नम्बर ४ मा ५३ जना नागरिकले राष्ट्रिय परिचयपत्र बनाएका छन् ।परिचयपत्र बनाउन जिल्लाबाट खटिएर आएका कर्मचारी टोलीले नागरिकको विवरण भर्ने, फोटो खिचाउने लगायतका कामको थालनी गरेको छ । यस अघि जिल्ला प्रशासन कार्यालय दाङ र इलाका प्रशासन कार्यालय लमहीबाट राष्ट्रिय परिचयपत्रको विवरण भर्ने काम हुँदै आएको थियो । बिहीबार राप्ती गाउँपालिका वडा नम्बर ४ ले वडाको टोल स्तरबाट कर्मचारी खटाई राष्ट्रिय परिचयपत्रका लागि फोटो खिचाउने र विवरण भर्ने काम सुरू गरेको वडा अध्यक्ष विरबहादुर चौधरीले बताएका छन् ।

नागरिकता प्रमाणपत्र प्राप्त गरिसकेका सबै नागरिकको राष्ट्रिय परिचयपत्रको लागि विवरण भरिने छ । वडास्तरमा राष्ट्रिय परिचयपत्र बनाउने टोली पुगेसँगै परिचयपत्रको लागि फाराम भर्ने नागरिकको भिड लाग्न थालेको छ ।  यसै बीच राप्ती गाउँपालिकाले मातहतका ९ वटै वडाहरुलाई परिपत्र गरि राष्ट्रिय परिचयपत्र बनाउन स्थानीय नागरिक तथा वडाबासीहरुलाई सूचना सम्प्रेषण र अन्य सहयोग गरिदिन आग्रह गरेको छ ।परिचयपत्र बनाउन आउँदा नागरिकहरुले नेपाली नागरिकताको प्रमाणपत्रको सक्कल सहित नागरिकताको प्रमाणपत्रमा जन्म मिति नखुलेकाको हकमा सो खुल्ने प्रमाण वा गाउँपालिकाको सिफारिस, नागरिकका प्रमाणपत्रमा उल्लेख भएको ठेगाना भन्दा फरक ठेगाना भएमा त्यस्तो ठेगाना प्रमाणित गर्ने बसाई सराई प्रमाणपत्र वा बसोबास प्रामाणित भएको कागज, नागरिकताको प्रमाणपत्रमा पति पत्नीको नाम नखुलेमा विवाह दर्ता प्रमाणपत्र वा विवाह प्रमाणित भएको कागज वा नाता प्रमाणित वा पति पत्नी भएको प्रमाणित हुने अन्य सरकारी कागज, नागरिकताको प्रमाणपत्रमा अंग्रेजीमा नाम नखुलेको भए सम्भव भएसम्म अंग्रेजीमा नाम खुल्ने कागजात, विवरण पुष्टि गर्ने अन्य कागजातहरु अनिवार्य साथमा ल्याउनु पर्ने सम्बन्धित वडाहरूले आग्रह गरेका छन् ।