तुलसीपुरको हात्तीखौवामा प्रथम लुम्बिनी प्रदेश स्तरीय कृषि तथा पर्यटन महोत्सव सुरु
तुलसीपुर २५ मंसिर । जलस्रोत उर्जा तथा सिंचाई राज्यमन्त्री अर्जुन श्रेष्ठले विकासका लागि युवाहरुको हिम्मत र प्रोत्साहनलाई अगाडि बढाउनु पर्ने बताएका छन् । युथ अफ तुलसीपुरको आयोजनामा आज देखि तुलसीपुरको हात्तीखौवाका सञ्चालन भएको महोत्सवको उद्घाटन गर्दै राज्यमन्त्री श्रेष्ठले यस्तो बताएका हुन् ।
प्रथम लुम्बिनी प्रदेश स्तरीय कृषि तथा पर्यटन महोत्सव २०७९ को उद्घाटन कार्यक्रममा बोल्दै राज्यमन्त्री श्रेष्ठले तुलसीपुरको समग्र विकास लागि मेला महोत्सव लाग्नु आवश्यक रहेको बताए । ‘तपाईहरु यो महोत्सवलाई सहयोग हुने वातावरण बनाउनुस्, महोत्सवलाई सफल पार्ने कार्यक्रम गर्नुस् तब मात्र तुलसीपुरको विकास हुन्छ’ उनले भने ।
मन्त्री श्रेष्ठले विद्यालय, कलेजहरुमा पुस्तकालयको अभाव रहेको बेला पुस्तकालय स्थापनाका लागि महोत्सव लगाएर यस क्षेत्रका विद्यार्थीको फाइदा हुने काम गरेकोमा क्लवप्रति धन्यवाद व्यक्त गरेका थिए ।
उद्घाटन कार्यक्रमको समापन गर्दै युथ अफ तुलसीपुरका अध्यक्ष ऋषिराज लाहरे(अरुण लहरे)ले पुस्तकालय निर्माणको लागि सञ्चालन भएको महोत्सवको सबैले अवलोकन गरिदिन आग्रह गरे र महोत्सवको आयव्यय दुई महिनाभित्रै सार्वजनिक गर्ने बताए ।युथ अफ तुलसीपुरले तुलसीपुरमा पुस्तकालय स्थापना गर्ने उद्देश्यले महोत्सव लगाएको छ । तुलसीपुरको हात्तीखौवा स्थित मंसिर २५ गतेदेखि पुष ६ गतेसम्म लाग्नेछ ।
