बाबुराम नेतृत्वको नेपाल समाज पार्टीद्धारा निर्वाचन घोषणा-पत्र सार्वजनिक (पूर्णपाठ सहित)
काठमाडाैँ ६ कार्तिक । ‘नेपाल समाजवादी पार्टीको दूरदृष्टि ! सबैलाई लोकतन्त्र, सबैलाई समृद्धि !’ भन्ने मूल नारासहित डा. बाबुराम भट्टराई नेतृत्वको नेपाल समाजवादी पार्टी (नेसपा) ले मङ्सिरमा हुने प्रदेश र प्रतिनिधि सभा सदस्यको निर्वाचन २०७९– का लागि घोषणा पत्र सार्वजनिक गरेको छ ।
पहिलो कडी–संविधान संशोधन मार्फत लोकतन्त्रको लोकतान्त्रीकरण गर्नुपर्ने उल्लेख छ भने दोस्रो अहिले अभ्यास गरिरहेको लोकतन्त्र सीमित र औपचारिक प्रकारको लोकतन्त्र भएकाले मुलुक भित्रका सम्पूर्ण नागरिकलाई वास्तविक रूपमा सार्वभौमसत्ता सम्पन्न नबनाईकन लोकतन्त्र सबल, सक्षम र कामयाबी नहुने उल्लेख छ । ‘यो औपचारिक लोकतन्त्रलाई पूर्ण लोकतन्त्रमा रूपान्तरण गर्न वर्तमान संविधानमा प्रत्यक्ष निर्वाचित राष्ट्रपतीय प्रणाली लगायतका निम्ति संशोधन गर्नु पर्दछ’, सो पार्टीले संविधान संशोधनमा जोड दिएको छ ।
‘२०७४ सालमा भएको आम निर्वाचनपछि बनेको झन्डै दुई तिहाइ बहुमत नजिकको सरकारले पनि पूरा कार्यकाल पूरा गर्न नसकेबाट हाम्रो निर्वाचन प्रणाली र शासकीय स्वरूपमा गम्भीर त्रुटि छ र त्यो त्रुटि नसच्याएसम्म देशमा राजनीतिक स्थिरता हुन्न र राजनीतिक स्थिरताबिना देशमा सुशासन र समृद्धि आउन्न भन्ने पुष्टि भैसकेको छ’, नेसापाले भनेको छ, ‘यही तथ्यलाई आत्मसात् गर्दै हामीले प्रत्यक्ष निर्वाचित कार्यकारी राष्ट्रपतीय प्रणाली र पूर्ण समानुपातिक संसद्को माग उठाएका छौँ र समावेशिता, संघीयता, सुशासन, समृद्धि र समाजवादको ध्येय अनुसरण गर्ने नेपाल समाजवादी पार्टी (नेसपा)को रूपमा वैकल्पिक शक्ति निर्माण गरेर तपाईंहरू समक्ष उपस्थित भएका छौँ ।’
नेसपाले घोषणापत्रमा लोकतन्त्रको लोकतान्त्रिकरणका लागि १० बुँदे संकल्प अघि सारेको छ । जसमा राज्य पुनर्संरचना आयोगको प्रतिवेदन अनुरूप प्रदेशहरूको पुनर्संरचना, अन्तरपार्टी लोकतन्त्र सुदृढ गर्न सबै दलका सबै तहमा प्राइमरी इलेक्सन, प्रत्यक्ष निर्वाचित राष्ट्रपति र प्रदेश प्रमुखमा एक व्यक्ति एक कार्यकालभन्दा बढी हुन नपाउने, स्वतन्त्र मन्त्रीमण्डल गठन, सांसदको भुमीमा विधायकीमात्र, राष्ट्रिय जीवनका महत्त्वपूर्ण सवालमा जनमत सङ्ग्रह, निर्वाचनमा राइट टु रिजेक्ट र राइट टु रिकलको व्यवस्था र आर्थिक पारदर्शिता सङ्कल्पका रूपमा अघि सारेको छ ।
नेसपा मङ्सिरको निर्वाचनमा सत्ता गठबन्धनको प्रमुख घटक नेकपा (माओवादी केन्द्र)को चुनाव चिन्ह ‘गोलाकारभित्रको हँसिया र हतौडा’ चुनाव चिह्न लिएर चुनावमा जाँदैछ ।
