दाङमा पनि डेंगुका संक्रमित बढ्दो, ६३५ जनामा संक्रमण, सावधान अपनाउन दाङका सबै पालिकालाई निर्देशन
दाङ २८ भदौ । दाङमा साउनयता डेंगु रोगका बिरामीको संख्या दिनप्रति दिन बढ्दै गएको भन्दै संक्रमण फैलिनबाट रोक्नका लागि सबै पालिकाहरुलाई निर्देशन दिएईको छ । प्रमुख जिल्ला अधिकारी हिरालाल रेग्मीले जिल्लाका १० वटै पालिकाका स्वास्थ्य शाखा प्रमुखहरु र पालिका प्रमुखहरुलाई डेंगु रोग नियन्त्रणका लागि सावधान अपनाउन निर्देशन दिएका हुन् ।
प्रमुख जिल्ला अधिकारी रेग्मीका अनुसार संक्रमित लामखुट्टे जताकतै जानसक्ने भएकोले सबैलाई सर्तकता अपनाउनुका साथै संक्रमण फैलिएका स्थानमा लामखुट्टेको बास स्थान खोज्ने र नष्ट गर्ने कार्यक्रमहरु संचालन गर्न निर्देशन दिएका छन् ।
जिल्लामा साउन १ गतेदेखि यता ६ सय ३५ जनामा डेंगी रोगको संक्रमण देखिएको स्वास्थ्य कार्यालय दाङका डेंगु रोग फोकल पर्सन देवराज डाँगीले बताए । जिल्लाका पाँच स्थानीय मध्य सबैभन्दा बढी संक्रमण घोराही उपमहानगरपालिकामा ३१५ जनामा संक्रमण देखिएको छ ।
त्यस्तै तुलसीपुर उपमहानगरपालिकामा १८ जना, लमही नगरपालिकामा ९ जना, राप्ती गाउँपालिकामा ३ जना र गढवा गाउँपालिकामा एक जना संक्रमित रहेका छन् । अन्य बबई, शान्तिनगर, राजपुर, बंगलाचुली र दंगीशरण पालिकामा भने डेंगी रोगको संक्रमण नदेखिएको फोकल पर्सन डाँगीले जानकारी दिए ।
जिल्लामा डेंगु रोग फैलिन थालेपछि दश वटै स्थानीय तहलाई पत्राचार गरिएको स्वास्थ्य कार्यालय दाङले जनाएको छ । डेंगु संक्रमण पुष्टि भएका पालिकाहरुले लामखुट्टेको बास स्थान खोजि गर्ने र लार्भा नष्ट गर्ने कार्यक्रम संचालन गरेको फोकल पर्सन डाँगीले बताए । जिल्लाका विभिन्न अस्पतालमा अहिले डेंगु रोगका लक्षण देखा परेका बिरामीहरु उपचार गर्न आउनेहरुको भिडभाड लाग्ने गरेको छ ।
