प्रदेशकाे स्थायी राजधानीका लागि राप्ती गाउँपालिकामा भाैतिक निर्माण स्थल र शिक्षालय व्यवस्थापनका बिषयमा छलफल
राप्ती गाउँपालिकाले मात्रै १६ सय विघा जग्गा उपलब्ध गराउने प्रतिबद्धता
देउखुरी टुडेकर्मी, देउखुरी २० कात्तिक । लुम्बिनी प्रदेशको स्थायी राजधानीको लागि स्थान, भौतिक निर्माण स्थल तथा राप्ती प्राविधिक शिक्षालय व्यवस्थापनका बिषयमा बिहिबार देउखुरीकाे राप्ती गाउँपालिकामा ब्यापक छलफल गरिएको छ ।
गाउँ कार्यपालिकाको बैठकले लुम्बिनी प्रदेशको स्थायी राजधानीका लागि राप्ती गाउँपालिकाको सम्पूर्ण वडा, शितगंगा र गढवा पालिका समेत निर्णय भएकोमा राप्ती गाउँपालिकाको सार्वजनिक जग्गा, वनको खाली क्षेत्र तथा नदी किनार गरी करिव १६ सय विघा जग्गा नियमानुसार उपलब्धताको लागि कार्य सुरु गर्ने गरी छलफल गरिएको गाउँपालिकाका प्रबक्ता विद्याशरण चौधरीले जानकारी दिए ।
राप्ती गाउँपालिका अध्यक्ष नुमानन्द सुवेदीको अध्यक्षतामा बसेको बैठकमा लु्म्विनी प्रदेशको प्रदेश सभा सञ्चालनका लागि राप्ती प्राविधिक शिक्षालयलाई ब्यवस्थापन गर्ने प्रदेश स्तरियमा छलफल भैरहेकोले शिक्षालयको अध्यन अध्यापनको बैकल्पिक ब्यवस्थाको लागि लालमटिया स्थित आदर्श नमूना विद्यालय, ऐरावती क्याम्पस र मौरिघाटको माध्यामिक विद्यालयको जग्गा तथा भौतिक संरचना, गढवाको सरस्वती माध्यामिक विद्यालयको शिक्षा मन्त्रालय र सीटीईभीटीले अवलोकन गर्ने बारेमा समेत जानकारी गरिएको छ ।
पछिल्लो समसामयिक विषय, कोरोना संक्रमण नियन्त्रणमा गाउँपालिका स्तरबाट भैरहेको प्रयास एवं विकास निर्मार्णको अवस्थाको वारेमा समेत बैठकका सदस्य सचिव प्रमुख प्रशासकिय अधिकृत शोभाराम रिजालले जानकारी गराएका थिए ।
