दाङमा साथीको जन्मदिन मनाउन गएका युवकको मृत्यु भएपछि साथीहरु सहित ११ जना पक्राउ

दाङ १७ मंसीर । दाङका एक युवकको मृत्यु भएपछि होटेल संचालक सहित ११ जनालाई प्रहरीले नियन्त्रणमा लिएको छ । गत बुधवार साथीको जन्मदिन मनाउने क्रममा अचेत अवस्थामा फेला परेका घोराही १७ गुलरियाका २१ वर्षीय गणेश पौडेलको बुटवलमा उपचारको क्रममा मृत्यु भएपछि घटना सार्वजनिक भएको छ ।

पौडेलको विहिवार बेलुका अस्पतालमा उपचारका क्रममा मृत्यु भएको जिल्ला प्रहरी कार्यालय दाङका प्रहरी निरीक्षक मोहन थापाले जानकारी दिए ।उनका अनुसार फ्रेन्ड एण्ड फेमिली होटेलमा गएको बुधवार मृतक पौडेलका साथी नविन गिरीको जन्मदिन मनाउन १६-१७ जना भेला युवाहरुभेला भएका थिए ।

उनीहरुले होटेलको तिन वटा कोठा लिएर जन्मदिन मनाएका थिए ।सोहि दिन रात परेपछि ११ जना होटेलमै बास बसेका थिए । मृतक पौडेल संगै एउटै कोठामा बसेका साथीले विहिवार विहान साढे चार बजे होटेल बाहिर अचेत अवस्थामा देखेपछि आफन्तीले खवर गरी राप्ती स्वास्थ्य विज्ञान प्रतिष्ठान घोराही हुदै थप उपचारका लागि बुटवल लगीएको र सोहि अस्पतालमा उपचारकै क्रममा मृत्यु भएको उनले जानकारी दिए ।

युवकको मृत्यु पछि मृतकका आफन्तीले घटना संकास्पद भएको भन्दै प्रहरी कार्यालयमा किटानी जाहेरी दिएका छन् । जाहेरीको आधारमा होटेल संचालक सहित ११ जनालाई पक्राउ गरी घटनाको बारेमा अनुसन्धान भईरहेको प्रहरी निरीक्षक थापाले जानकारी दिए । मृतकको शवलाई बुटवलमा पोष्टमाटम गरी दाङ ल्याउने तयारी भईरहेको उनले जानकारी दिए ।

प्रतिक्रिया दिनुहोस्