लुम्बिनी सरकारले प्रतिस्थापन विधेयकमार्फत नयाँ बजेट ल्याउदै

बुटवल २० असोज । लुम्बिनी प्रदेश सरकारले प्रतिस्थापन विधेयकमार्फत नयाँ बजेट ल्याउने अन्तिम तयारी गरेको छ । लुम्बिनी प्रदेश सभाको बैठक आज( बुधबार बस्ने कार्यसूचि छ । सरकारका तर्फबाट आर्थिक मामिला तथा सहकारी मन्त्री कृष्णध्वज खड्काले बैठकमा प्रतिस्थापन विधेयक मार्फत बजेट पेश गर्ने तयारी गरेका छन् । गत साउन २८ गते माओवादी केन्द्रका कूलप्रसाद केसी नेतृत्वमा नेपाली कांग्रेस, जनता समाजवादी पार्टी, राष्ट्रिय जनमोर्चा र स्वतन्त्र सांसद अजय शाही समेतको समर्थनमा गठबन्धन सरकार बनेको थियो ।

नयाँ सरकार गठन भएको दुई महिना पुग्न लाग्दा समेत मन्त्रिपरिषदलाई पूर्णता दिन नसक्दा सरकारको चर्को आलोचना हुँदै आएको छ । नयाँ आउने बजेटमा लुम्बिनी प्रदेश बैंक स्थापना, मुख्यमन्त्री शैक्षिक सुधार कार्यक्रम, बुद्ध जन्मस्थल लुम्बिनीको पर्यटन प्रवर्द्धनका लागि बहु–सांस्कृतिक डबली निर्माण तथा निजी क्षेत्रसँगको सहकार्यमा स्थानीय कच्चा पदार्थमा आधारित मायाको चिनो तथा उपहार सामग्री उत्पादन उद्योग स्थापना लगायतका नयाँ कार्यक्रम समेटेर बजेट ल्याउन लागिएको नेपाली कांग्रेसका प्रमुख सचेतक फखरुद्दिन खानले बताए । त्यसैगरी सरकार बनेको दुई महिना पुग्न लाग्दा समेत मन्त्रिपरिषदलाई पूर्णता दिन मुख्यमन्त्री केसी र गठवन्धन दलका नेताहरु असफल भएका छन् ।

गठबन्धनको सहमतिअनुसार सरकारमा माओवादीले मुख्यमन्त्रीसहित पाँच मन्त्रालय र कांग्रेसले चार मन्त्रालय पाएको छ । जसपालाई तीन र स्वतन्त्र सांसदले एक मन्त्रालयमा सहमति गरेका थिए । सरकार गठन भएकै दिन जसपाबाट सहषराम यादव, सुमन शर्मा रायमाझी र स्वतन्त्रबाट अजय शाही मन्त्री बनिसक्नु भएको छ । कांग्रेसबाट डिल्लीबहादुर चौधरीलाई मात्र मन्त्री बनाइएको छ । माओवादी केन्द्रबाट मुख्यमन्त्री बाहेक कृष्णध्वज खड्का मन्त्री बनेका छन् । तर अन्य तीन जना मन्त्रीको टुंगो लगाउन नसक्दा मन्त्रिपरिषद विस्तारमा ढिलाइ भएको छ ।

प्रतिक्रिया दिनुहोस्