देशभर मंगलबार थप २,५२५ जनामा काेराेना संक्रमण पुष्टि, २,०८६ जना संक्रमण मुक्त, ३५ जनाकाे मृत्यु
काठमाण्डाै ८ भदाै । देशभर मंगलबार थप २ हजार ५ सय २५ जनामा कोरोना सङ्क्रमण पुष्टि भएको छ । ९ हजार ९ सय ९ जनाको पीसीआर र ४ हजार १ सय ९ जनाको एन्टिजेन गरी १४ हजार ८ सय १० जनाको नमुना परीक्षण गर्दा २ हजार ५ सय २५ जनामा कोरोना सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
मंगलबार नमुना परीक्षण गरिएका नमुनामध्ये १७ दशमलव शून्य चार प्रतिशतमा सङ्क्रमण पुष्टि भएकाे हो । आज थपिएकासहित नेपालमा कोरोना सङ्क्रमण पुष्टि हुनेको सङ्ख्या आठ लाख ३१ हजार नौ सय ६८ पुगेको छ ।
यस्तै थप दुई हजार ८६ जना निको भएसँगै कोरोना सङ्क्रमणमुक्त हुनेको सङ्ख्या सात लाख दुई हजार एक सय ८३ पुगेको छ । यही अवधिमा थप ३५ जनाले कोरोना सङ्क्रमणका कारण ज्यान गुमाएका छन् । योसहित कोरोनाबाट ज्यान गुमाउनेको सङ्ख्या १० हजार पाँच सय ६८ पुगेको छ ।
अहिले नेपालमा ३८ हजार २ सय ५० जना सक्रिय सङ्क्रमित रहेकामा ६ सय २० जनाको आईसीयू र १ सय ७० जनाको भेन्टिलेटरमा उपचार भइरहेको छ ।
