एमालेकी उपाध्यक्ष अष्टलक्ष्मी शाक्य नेपालको पहिलो महिला मुख्यमन्त्री, मुख्यमन्त्री शाक्यले शपथ लिए
काठमाण्डाै ३ भदाै । नेकपा एमालेकी उपाध्यक्ष अष्टलक्ष्मी शाक्य नेपालको पहिलो महिला मुख्यमन्त्री बनेकी छिन् । उनले हिजो अबेर वाग्मती प्रदेशको मुख्यमन्त्रीको शपथ लिएकी छिन् । मुख्यमन्त्री डोरमणि पौडेलले एमाले संसदीय दलको नेता र मुख्यमन्त्री पदबाट राजीनामा दिएपछि शाक्य मुख्यमन्त्री बनेकी हुन्।
मुख्यमन्त्रीमा नियुक्त भएलगत्तै शाक्यले दुई मन्त्री पनि नियुक्त गरेकी छिन् । कृष्ण खनाल सामाजिक विकासमन्त्री र केशवराज पाण्डे भौतिक पूर्वाधार विकासमन्त्री बनेका छन् । भूमि व्यवस्था, कृषि तथा सहकारी, उद्योग पर्यटन, वन तथा वातावरण, आन्तरिक मामिला तथा कानुन, आर्थिक मामिला तथा योजना मन्त्रालय मुख्यमन्त्री शाक्यले नै राखेकी छिन् ।
६७ वर्षअघि काठमाण्डौको झोछेँ टोलमा जन्मिएकी शाक्य १८ वर्षको उमेरमा एसएलसी परीक्षा पूरा गरेपछि चिनियाँ भाषा सिकेकी छिन् । रत्न राज्यलक्ष्मी क्याम्पसमा उच्च शिक्षाका लागि भर्ना भएकी शाक्यले तत्कालीन नेकपा मालेको सम्पर्कमा पुगेर जन्म घर छाडेरै भूमिगत राजनीति सुरु गरेकी थिइन् ।
२६ वर्षको उमेरमा मालेकै नेता अमृत बोहोराका साथ भूमिगत रुपमा पार्टीकै आयोजनामा प्रगतिशील विवाह गरेकी शाक्यले देशमा बहुदलीय प्रजातान्त्रिक व्यवस्था आएपछि २०५६ सालमा काठमाण्डौको ४ नम्बर क्षेत्रबाट निर्वाचित भएर त्यसको पाँच वर्षपछि पहिलो पटक महिला, बालबालिका तथा समाज कल्याण मन्त्री बनिन् ।
त्यसैगरी तीन वर्षपछि उद्योग मन्त्री पनि बनिन् । नेकपा एमालेका केन्द्रीय सदस्य, महिला विभाग प्रमुख, स्थायी समिति सदस्य हुँदै उपाध्यक्षमा निर्वाचित शाक्य पछिल्लो पटक काठमाण्डौ क्षेत्र नम्बर ८ बाट प्रदेश सभामा निर्वाचित भएकी थिइन् ।
