सुदूरपश्चिम, लुम्बिनी र गण्डकी प्रदेशमा ठूलो पानी पर्ने
काठमाण्डाै ३० जेठ । यो हप्ताभरि नै मनसुन सक्रिय रहने मौसमविद्ले बताएका छन् । अस्ति २८ गते भित्रिएको मनसुन यो हप्ताभरि नै सक्रिय रहने र यसले गर्दा देशका धेरै ठाउँमा ठूलो पानी पर्ने मौसमविद् वरुण पौडेलले जानकारी दिए। उनका अनुसार अहिले प्रदेश-१ र लुम्बिनी प्रदेशको पूर्वी क्षेत्रसम्म मनसुनी वायुको प्रभाव परेको छ ।
यो बिस्तारै देशभर फैलिने र एक/दुई दिनभित्रै देशभरको मौसम बद्ली भइ हल्कादेखि ठूलो पानी पर्ने मौसमविद् पौडेलले बताए । यो हप्ता सुदूरपश्चिम, लुम्बिनी, गण्डकी र पश्चिम तराईका जिल्लाका केही ठाउँमा ठूलो पानी पर्ने हुँदा सावधानी अपनाउन मौसमविद्ले आग्रह गरेका छन् । अन्य ठाउँमा भने सामान्यदेखि हल्का वर्षा हुनेछ । यसैबीच, अहिले देशभरको मौसम बद्ली भएको छ ।
मनसुनी वायुको प्रभावका अहिले गण्डकी, लुम्बिनीको तराईका जिल्ला र प्रदेश-१ का केही ठाउँमा पानी परिरहेको मौसमविद्ले बताएका छन् । मौसमविद् वरुण पौडेलले दिउँसो पनि देशभरको मौसम बद्ली रहने बताउनु भएको छ । यस्तै, राति पनि देशका धेरै ठाउँमा पानी पर्ने अनुमान छ ।
