भारतमा मार्च १ मा दोस्रो चरणको खोप अभियान थालिने

एजेन्सी (नयाँ दिल्ली)- भारतमा कोरोना भाइरसविरुद्धको दोस्रो चरणको खोप अभियान मार्च १ मा सुरु हुने भएको छ ।सरकारी अधिकारीहरुले दिएको जानकारीअनुसार मार्च १ देखि ६० वर्षभन्दा बढी उमेरका व्यक्तिहरुलाई खोप लगाइने भएको छ ।

दिर्घरोगीको हकमा भने ४५ वर्ष माथीकालाई पनि कोरोनाभाइरसविरुद्धको खोप दिइने अधिकारीहरुको भनाइ छ ।मन्त्रिपरिषद्को बैठकपछि पत्रकारहरुसँगको कुराकानी गर्दै मन्त्री प्रकाश जवादेकरले दोस्रो चरणको खोप अभियानबारे जानकारी दिएका हुन् ।सरकारी स्वास्थ्य संस्थामा खोप लगाउनेलाई निःशुल्क खोप लगाउने व्यवस्था गरिए पनि निजी स्वास्थ्य संस्थामा खोप लगाउनेहरुले भने आफैँले रकम तिर्नु पर्ने व्यवस्था गरिएको उनले बताए ।

खोप लगाउनका भारतमा सरकारी क्षेत्रबाट दश हजारभन्दा बढी खोप केन्द्रहरु तोकिएको छ भने निजी क्षेत्रबाट २० हजारभन्दा बढी खोप केन्द्रहरु खोलिएका छन् ।निजी क्षेत्रले लिने शुल्क पनि सरकारले तीन/चार दिनमै तोकिदिने मन्त्री जवादेकरले जानकारी दिए ।भारतमा पहिलो चरणमा एक करोड सात लाख ६७ हजारभन्दा बढीले कोरोनाभाइरसविरुद्धको खोप लगाएको तथ्याङ्क छ । भारतले जनवरी १६ मा पहिलो चरणको खोप अभियान सुरु गरेको थियो ।