लमहीमा मोटरसाइकल दुर्घटना हुँदा एक जनाको मृत्यु

लमही १० मंसिर । दाङ देउखुरीको लमहीमा मोटरसाइकल दुर्घटना एक जनाको मृत्यु भएको छ ।

सोमबार बिहान साढे चार बजेको समयमा लमही बजारबाट तुलसीपुर तर्फ जाँदै गरेको रा ७ प ४९५४ नम्बरको मोटरसाइकल लमहीको रातोडाँडा स्थित प्रहरीको बेरिगेटमा ठोक्किएर दुर्घटना हुँदा सल्यान बागचौर नगरपालिका-३ हाल तुलसीपुर -९ बेलुवा बस्ने अन्दाजी ३० वर्षका लिलाराम डाँगी मृत्यु भएको जिल्ला प्रहरी कार्यालय दाङका प्रहरी प्रवक्ता ईश्वर थापाले जानकारी दिएका छन् ।

दुर्घटनामा परि गम्भीर घाइते भएका डाँगीको लमही अस्पतालमा उपचारका क्रममा ज्यान गएको प्रवक्ता थापाले बताए । मोटरसाइकल चालक तुलसीपुर उपमहानगरपालिका-५ न्युरोड बस्ने अन्दाजी २६ वर्षका रोशन विक सामान्य घाइते भएका छन । उनलाई वडा प्रहरी कार्यालय लमहीले नियन्त्रणमा लिएको छ ।