रुकुम पूर्वकाे पुथा उत्तरगङ्गा–२ को अध्यक्षमा माओवादीका उम्मेदवार निर्विरोध

काठमाण्डाै ५ मंसिर । रुकुम पूर्वको पुथा उत्तरगङ्गा गाउँपालिका वडा नम्बर २ को अध्यक्षमा नेकपा (माओवादी केन्द्र) का उम्मेदवार जगत घर्ती निर्विरोध निर्वाचित भएका छन् ।

एमाले–कांग्रेसको सत्तारूढ गठबन्धनबाट उम्मेदवार बनेका एमाले उम्मेदवार जीवन रोका र स्वतन्त्र उम्मेदवारले नाम फिर्ता लिएपछि माओवादी केन्द्रका उम्मेदवार घर्ती निर्विरोध निर्वाचित भएको निर्वाचन अधिकृतको कार्यालयले जनाएको छ । पुथा उत्तरगङ्गा गाउँपालिकाकाे उपाध्यक्षमा एमाले जिल्ला उपसचिव केसकुमारी तुलाचन कांग्रेसको चुनाव चिह्न लिएर उम्मेदवार बनेकी छिन् । उपाध्यक्षमा माओवादी केन्द्रका तर्फबाट नरपुरा बुढा उम्मेदवार छिन् ।

यसैबीच जिल्ला समन्वय समिति कैलालीको प्रमुखमा नेपाली कांग्रेसकी उम्मेदवार टीकाकुमारी चौधरी (भूल) निर्विरोध निर्वाचित भएकी छिन् । नागरिक उन्मुक्ति पार्टीबाट उम्मेदवारी दर्ता गराएकी रुपमती डगौरा थारुले उम्मेदवारी फिर्ता लिएसँगै अर्की उम्मेदवार चौधरी निर्विरोध निर्वाचित भएकी हुन् ।