भद्राक्षी मगर युवा क्लवद्धारा देउसी भैलोको रकम निलसागर सेवा आश्रमलाई सहयोग
भालुवाङ २३ कार्तिक । दाङको राप्ती गाउँपालिका वडा नम्बर ९ देवीकोटमा रहेको भद्राक्षी मगर युवा क्लवले देउसी भैलोबाट संकलित रकम निलसागर सेवा आश्रमलाई सहयोग गरेको छ ।
क्लवका अध्यक्ष ओबिन्द्र सुनारी मगरको नेतृत्वको टोलीले शुक्रवार राप्ती गाउँपालिका वडा नम्बर ८ पिपरीमा रहेको आश्रममा पुगी देउसीभैलोबाट संकलित रकमबाट खर्च कटाएर बचेको रकम मध्ये नगद १० हजार रुपैयाँ आश्रमलाई प्रदान गर्नुका साथै सडक आश्रित मानवहरुलाई विहानको १ छाक खाना समेत खुवाएको छ ।
भैलोको रकम सामाजिक क्षेत्रमा पनि सहयोग गर्नुपर्छ भन्ने सोचाईका साथ क्लवका अध्यक्ष ओबिन्द्र सुनारी मगरले ९ नम्बर वडा अध्यक्ष रिमबहादुर सुनारी मगरको रोहवरमा सो रकम आश्रमका कार्यवाहक अध्यक्ष गरिवु चौधरीलाई हस्तान्तरण गरेका थिए । क्लवले सञ्चालन गरेको देउसीभैलोबाट कुल १ लाख १५ हजार संकलन गरेकोमा खर्च कटाएर बचेको १ लाख ३ हजार रकम मध्ये नगद १० हजार आश्रमलाई हस्तान्तरण गर्नुका साथै एक छाक खाना खुवाएको छ । रकम हस्तान्तरण कार्यक्रममा क्लवका उपाध्यक्ष भेषबहादुर घर्ती मगर, कोषाध्यक्ष सुवर्ण गाहामगर र सदस्य अर्जुन घर्तीमगर, पत्रकार ओमप्रकाश गुप्ताको उपस्थिती रहेको थियो ।
