लुम्बिनीमा ५ लाख भन्दा माथिका सबै योजनाहरु टेन्डर प्रकृयाबाट मात्र गरिने
भालुवाङ १४ साउन । लुम्बिनी प्रदेश सरकारले ५ लाख भन्दा माथिका सबै योजनालाई प्रतिस्पर्धाबाट मात्रै कार्यान्वयनमा लैजाने भएको छ । मुख्यमन्त्री चेतनारायण आचार्यले ५ लाख भन्दा माथिका बजेट शीर्षकका योजना प्रतिस्पर्धाबाट मात्रै कार्यान्वयन गर्न निर्देशन जारी गरेका हुन् ।
उनले योजना कार्यान्वयन गर्दा कोटेसनमा गर्ने, आफू अनुकूलका उपभोक्ता समिति बनाउने प्रवृत्ति रहेको भन्दै त्यसलाई रोक्न जरुरी रहेको बताए । उपभोक्ताको नाम राख्ने तर, योजना ठेकेदारले कार्यान्वयन गर्ने गरिन्छ । लुम्बिनी प्रदेश सरकारले चालू आर्थिक २०८१/०८२ का लागि ३८ अर्ब ९७ करोड रुपैयाँको बजेट ल्याएको थियो । साउन महिना भित्र मन्त्रालयहरुले योजना कार्यान्वयनका कार्यविधि बनाइसक्ने निर्णय प्रदेश सरकारले गरेको छ । योजना कार्यान्वयनमा हुने ढिलासुस्ती हटाउन कार्यविधि बनाउने कामलाई सरकारले प्राथमिकतामा राखेको जनाएको छ ।
