लुम्बिनी प्रदेशका १३ वटा अस्पतालका विकास समिति खारेज
भालुवाङ १ कार्तिक । लुम्बिनी प्रदेश सरकारले प्रदेशका १३ वटा अस्पतालमा गठन भएका अस्पताल विकास समिति खारेज गरेको छ । बुधवार बसेको प्रदेश मन्त्रिपरिषद् बैठकले प्रदेशका १३ वटा अस्पतालमा गठन भएका अस्पताल विकास समिति खारेज गर्ने निर्णय गरेकाे हाे ।
प्रदेश सरकारका प्रवक्ता तथा गृहमन्त्री सन्तोषकुमार पाण्डेका अनुसार सरकारले अस्पताल विकास समिति (गठन तथा सञ्चालन) नियमावली, २०८० स्वीकृत गर्दै अस्पताल विकास समिति गठन आदेशहरू खारेज गर्ने र खारेज गर्ने सूचना राजपत्रमा प्रकाशन गरिने निर्णय गरेको जानकारी दिए ।
यस्तै, प्रदेश सरकारले सिकेलसेल, थालेसेमिया र हेमोफिलियाका विरामीको परिवारलाई निःशुल्क बीमा कार्यक्रम सञ्चालन गर्ने भएको छ । जसका लागि कार्यविधि, २०८० स्वीकृत गरेको छ ।
जेष्ठ तथा अति असक्त नागरिकसँग स्वास्थ्यकर्मी कार्यक्रम सञ्चालन कार्यविधि, २०८०, स्वास्थ्य संस्था स्थापना, सञ्चालन, नवीकरण तथा स्तरोन्नति (चौथो संशोधन) नियमावली, २०८० स्वीकृत गर्ने निर्णय गरेको छ । प्रदेश स्वास्थ्य मन्त्रालयको तर्फबाट आएका सबै प्रस्तावहरू बैठकले पारित गरेको हो ।
