कालापानीमा बन्दै गरेको १५ शैयाको अस्पतालको अध्यक्ष विष्टद्धारा अनुगमन
सिसहनियाँ १० माघ । दाङ देउखुरीको राप्ती गाउँपालिका वडा नम्बर ५ कालापानीमा निर्माणाधीन १५ शैयाको अस्पतालको मंगलवार राप्ती गाउँपालिकाका अध्यक्ष प्रकाश विष्टको टोलीले अनुगमन तथा निरीक्षण गरेको छ ।
भवन संघीय सरकारको १९ करोड ४२ लाख ८२ हजार ६ सय ३७ रुपैया ९ पैसा शर्सत अनुदानमा निर्माण हुन लागेको हो । सो भवन बिकोई÷नव सिर्जनशील÷स्लेट–जे.भी. सिनामंगल–९ काठमाण्डौंले २०७८ साल फागुनमा १२ गते ठेक्का सम्झौता गरि २०८० साल चैत ११ गते भित्र काम सम्पन्न गर्ने गरि काम भैरहेको निर्माण व्यावसायी रवी गौतमले जानकारी दिएका छन् ।
यस अस्पतालको निर्माण कार्य सम्पन्न भई सञ्चालनमा आए पश्चात् राप्ती गाउँपालिका लगायत छिमेकी पालिकाका हजारौं नागरिकहरुले आफ्नै ठाउँबाट छिटो, छरितो र सुलभ रुपमा स्वास्थ्य सेवा पाउने छन् । अनुगमन तथा निरीक्षण कार्यक्रममा पालिकाकी उपाध्यक्ष कमलापति चौधरी, प्रमुख प्रशासकीय अधिकृत नेव बहादुर वली, ५ नम्बर वडा अध्यक्ष देबप्रसाद चौधरी लगायत प्राविधिकहरुको सहभागीता रहेको थियो ।
