राजस्व छलेर ६ किलो सुन भित्र्याएका पाँच जनाविरुद्ध साढे दुई अर्ब रुपैयाँ बिगो मागसहित मुद्दा दायर
काठमाण्डाै २४ बैशाख । राजस्व छली गरेर ६ किलोभन्दा धेरै सुन नेपाल भित्र्याउने पाँच जनाविरुद्ध साढे दुई अर्ब रुपैयाँ बिगो मागसहित मुद्दा दायर भएको छ ।
हेटौँडा प्रहरीले जाँचको क्रममा रातमाटे चेकपाेस्ट नजिकैबाट बसमा लुकाएर राखेको ६ किलो दुई सय ८९ ग्राम तीन सय ५० मिलिग्राम सुन बरामद गरेको थियो । यसै घटनामा भारतको कर्नाटकका अब्जुल मजिज अनेकल, कर्नाटककै रोशन पटेल, यश इम्पोर्ट एन्ड एक्सपोर्ट कन्सर्नका सञ्चालक राजेश गुरुङ, भैरव स्टोर्सका सञ्जिव श्रेष्ठ र काठमाण्डौका शंकर घिमिरेविरुद्ध राजस्व अनुसन्धान विभागले दुई अर्ब ५१ करोड ९० लाख रुपैयाँ बिगो र जेल सजायसहित मुद्दा दायर गरेको हो ।
अब्जुल मजिज अनेकल, रोशन पटेल र राजेश गुरुङलाई दुई अर्ब ४३ करोड, राजेश गुरुङलाई थप चार करोड ३० लाख, सञ्जीव श्रेष्ठलाई चार करोड ५६ लाख र शङ्कर घिमिरेलाई चार लाख २९ हजार रुपैयाँ बिगो माग गरिएको विभागले जनाएको छ ।
