१० बुँदे कार्यान्वयन कार्यदलबाट राजीनामा दिने भीम रावलकाे घाेषणा
काठमाण्डाै ५ कार्तिक । नेकपा एमालेका उपाध्यक्ष भीम रावलले १० बुँदे सहमति कार्यान्वयन गर्नका लागि गठित कार्यदलबाट राजीनामा दिने घाेषणा गरेका छन् । आज शुक्रवार ललितपुरकाे तुलसीलाल स्मृति प्रतिष्ठानमा बसेकाे पार्टीकाे स्थायी कमिटी बैठकपछि नेता रावलले कार्यदलको सदस्य समेत नरहने गरी राजीनामा दिने घोषणा गरेकाे बताए।
उपाध्यक्ष रावलले पार्टीको विधि, प्रक्रिया र निर्णय विपरीत दुई जना केन्द्रीय सदस्य मनोनित गर्ने निर्णय गरेकोमा पनि फरक मत राखेका छन् । उनले भने, ‘कार्यदल माथि नै प्रश्न उठ्ने गरी कुराकानी भएकाले मैले कार्यदलको संयोजक र त्यसको सदस्यसमेत नरहने गरी राजीनामा दिने त्यहीँ घोषणा गरेको छु । र म यो राजीनामा सम्बन्धमा मैले बैठकमा के पनि भनेको छु भने म व्यवस्थित रूपमा भोलि शनिवार राजीनामा पठाउँछु भनेर जानकारी पनि गराएको छु । त्यसको साथसाथै जुन हाम्रो १० बुँदे सहमति थियो, अपानी १२ थियो । त्यो अपानी १२ ले १० प्रतिशत केन्द्रीय सदस्यहरूको मनोनयन गर्ने र तत्सम्बन्धमा कार्यदलले गृहकार्य गर्ने भनेर निर्णय गरेको थियो र त्यो निर्देशनतर्फ कुनै ध्यान नदिने तर उनले दुई जना केन्द्रीय सदस्य मनोनयन गर्ने, प्रभु साहजीको समस्या समाधान गर्ने भन्ने कुरा ल्याउनु भएकाले त्यसप्रति पनि मेरा विमति छ । पार्टीको अपानी पद्धति, प्रक्रिया र निर्णय विपरीत भएकाले आफूले फरक मत राखेका हुँ ।’
यस्तै नेकपा एमालेले यही कात्तिक १२ गते पार्टी केन्द्रीय कमिटीको बैठक बोलाएको छ । पार्टीको १० औँ राष्ट्रिय महाधिवेशनको प्रतिनिधि चयनसम्बन्धी मापदण्ड तय गर्न पार्टी केन्द्रीय कमिटीको बैठक बोलाउने निर्णय गरेको हो । बैठकले रामबहादुर थापा नेतृत्वको २१ सदस्यीय महाधिवेशन मूल व्यवस्थापन कमिटीलाई पनि एक सदस्य पछि थप गर्ने गरी पूर्णता दिएको पार्टीका प्रवक्ता प्रदीप ज्ञवालीले जानकारी दिनुभयो ।
