विश्व वातावरण दिवसको अवसरमा राप्तीमा १ हजार ८ सय बढी बिरुवा रोपियाे

देउखुरी २३ जेठ। आज विश्व वातावरण दिवस ‘हाम्रो भूमि, हाम्रो भविष्य’ नाराका साथ नेपालमा पनि विविध कार्यक्रम गरी मनाइएकाे छ । हरेक वर्ष जुन ५ तारिखका दिन वातावरण दिवस विश्वव्यापी रुपमा मनाउने गरिन्छ ।यसै सन्दर्भमा विश्व वातावरण दिवसको अवसरमा दाङको राप्ती गाउँपालिकाले विरुवा राेपेर दिवस मनाएकाे छ । गाउँपालिकाले वडा नम्बर -२ कठाहामा अठार सय बढी बिरुवा रोपण गरेकाे छ । राप्ती गाउँपालिकाकाे आयोजना तथा सव डिभिजन वन कार्यालय गढवाको सहयोगमा राप्ती नदिकाे तटिय क्षेत्रमा रहेको करिब २ हेक्टर सार्वजनिक जग्गामा बिरुवा रोपण गरिएको हो। मौवा, जामुन, सिसाै, खयर, बकाइनाे, काेईरालाे सित्तलचिनी, गुल्मोहर, निलमर लगायत विभिन्न प्रजातिका बिरुवाहरु रोपिएको गाउँपालिकाका वन प्राविधिक बिपिन भुसालले जानकारी दिए । उक्त क्षेत्रमा रहेको करिब २० हेक्टर जग्गालाई सार्वजनिक वन बनाउने उदेश्यले विभिन्न प्रजातिका २२ हजार बिरुवा राेप्ने तयारी समेत गरिएको प्राविधिक भुसालले बताए ।