लुम्बिनी प्रदेश स्तरीय राष्ट्रिय थारू कलाकार मञ्च गठन : अध्यक्षमा श्रीनिवास चौधरी चयन
लमही ५ असोज । लुम्बिनी प्रदेशमा राष्ट्रिय थारू कलाकार मञ्च गठन गरिएको छ ।
शनिवार दाङको लमहीमा थारु कलाकारहरुको एक भेलाले केन्द्रको विधान अनुसार लुम्बिनी प्रदेशमा मञ्चको विस्तार गरिएको हो । भेलाले राष्ट्रिय थारू कलाकार मञ्च लुम्बिनी प्रदेशको अध्यक्षमा कपिलवस्तुका श्रीनिवास चौधरीलाई सर्वसम्मत चयन गरेको छ । चौधरीकै अध्यक्षतामा पछि १ सदस्य थप गर्ने गरी १५ सदस्यीय प्रदेश स्तरीय मञ्च गठन गरेको हो । जस अनुसार वरिष्ठ उपाध्यक्षमा बर्दियाका प्रदेशी चौधरी (दर्पण कुशुम्या), उपाध्यक्षमा बाँकेकी सुनिता दहित चौधरी, महासचिवमा रुपन्देहीका राजन चौधरी, सचिवमा नवलपरासीका प्रल्हाद चौधरी र कोषाध्यक्षमा दाङकी रचना चौधरी रहेकी छिन् । त्यसै गरी सदस्यहरुमा बर्दियाकी संगिता थारु, रुपन्देहीका दिनेश चौधरी, नवलपरासीका हेमराज चौधरी, दाङकी मधु चौधरी, कपिलवस्तुका विष्णु थारु, दाङका देवीराम चौधरी, सागर चौधरी र प्रेम चौधरी रहेका छन् ।
राष्ट्रिय थारू कलाकार मञ्च दाङका अध्यक्ष राजेन्द्र चौधरीको अध्यक्षता एवम् लुम्बिनी प्रदेश उर्जा, जलस्रोत तथा सिचाई मन्त्री सीता शर्मा चौधरीको प्रमुख आतिथ्यतामा प्रदेश स्तरीय मञ्च गठन गरिएको हो । सो अवसरमा बोल्दै प्रमुख अतिथि चौधरीले थारुहरुको भाषा, कला, संस्कृति संरक्षणका लागि थारु समुदायले पुरानो मानसिकता त्यागेर नयाँ सोचका साथ अगाडी बढ्नु पर्ने बेला आएको बताएकी छिन् । त्यस्तै उनले थारु भाषा, कला, संस्कृतिको पहिचानका लागि पाठ्यपुस्तकमा समावेश गर्न पनि आवश्यक रहेको बताएकी छिन् ।
सो अवसरमा राष्ट्रिय थारू कलाकार मञ्चका केन्द्रीय वरिष्ठ उपाध्यक्ष रोशन रत्गैया, केन्द्रीय सल्लाहकार लक्ष्मीमान चौधरी, साहित्यकार छविलाल कोपिला, थारु कल्याणकारिणी सभा क्षेत्रिय समिति क्षेत्र नम्बर १ का सचिव बालगोविन्द चौधरी, केन्द्रीय पार्षद प्रकाश चौधरी, राष्ट्रिय थारू कलाकार मञ्च कपिलवस्तु अध्यक्ष श्रीनिवास चौधरी, नवलपरासी अध्यक्ष सुदनप्रसाद चौधरी, रूपन्देही अध्यक्ष सुरेन्द्र चौधरी, पत्रकार सन्तोष कुमार गुप्ता र महिला समाजसेवी तथा बुद्धिजीवि लक्ष्मी चौधरी लगायतका वक्ताहरुले शुभकामना मन्तव्य व्यक्त गरेका थिए । मञ्चका दाङ जिल्ला सचिव रचना चौधरीको स्वागत मन्तव्यबाट सुरु भएको कार्यक्रमको सञ्चालन मञ्चका दाङ जिल्ला उपाध्यक्ष इन्द्रबहादुर चौधरीले गरेका थिए ।
