देशभर शनिबार थप ९९४ जनामा काेराेना संक्रमण पुष्टि, १,३६८ जना संक्रमणमुक्त, १२ जनाकाे मृत्यु
काठमाण्डाै २६ भदाै । देशभर शनिबार कोरोना संक्रमण पुष्टि हुनेको संख्या एक हजार भन्दा तल झरेको छ । पीसीआर र एण्टिजेन गरी ९ हजार ८ सय ४० जनामा काेराेना परीक्षण गर्दा जम्मा ९ सय ९४ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
नेपालमा दोस्रो लहर सुरु भएपछि पहिलोपटक दैनिक थपिनेको संख्या एक हजार भन्दा तल झरेको हो । २४ घण्टामा परीक्षण गरिएकामध्ये १० दशमलव १० प्रतिशतमा मात्रै संक्रमण देखिएको छ । नेपालमा अहिलेसम्म सङ्क्रमित हुनेकाे सङ्ख्या ८ लाख ६२ हजार नौ सय ४६ जना पुगेको छ ।
यस्तै शनिबार १ हजार ३ सय ६८ जना निको भएसँगै संक्रमणमुक्त हुनेको संख्या ७ लाख ३८ हजार ३४ जना पुगेको छ । थप १२ जनाले ज्यान गुमाएसँगै संक्रमणका कारण ज्यान गुमाउनेको सख्या १० हजार नौ सय ३६ जना पुगेको छ । नेपालमा अहिले २७ हजार ३ सय ५५ जना सक्रिय संक्रमित रहेकोमा ४ सय ५६ जनाको आईसीयू र १ सय २२ जनाको भेण्टिलेटरमा उपचार भइरहेको छ ।
