अध्यक्ष गणेश बस्नेतको अध्यक्षतामा आज बसेको केन्द्रीय सचिवालयको आकस्मिक बैठकले महासंघका महासचिव रोशन पुरीको नाममा जारी सूचना पत्रकारलाई सदस्यताबाट बञ्चित गरी आफू निकट गैरपत्रकार भर्ती गरेर महासंघको स्वतन्त्र छवि नै समाप्त पार्ने काम गरेको ठहरसहित सूचना नै फिर्ता लिन अल्टिमेटम दिने निर्णय गरेको हो ।
बैठकपछि महासचिव हिरामान लामाले बिज्ञप्ति जारी गरी भन्नुभएको छ, ‘प्रेस चौतारीका महासंघद्वारा जारी विज्ञप्तिमा सार्वजनिक नाम उपर मात्रै दाबी—विरोध, सफाइको मौका र न्यायका लागि आह्वान गर्ने समय निर्धारण गरिएको छ । व्यावसायिक तथा श्रमजीवी पत्रकारहरुलाई सदस्यता प्राप्ति र नवीकरणबाट बञ्चित गरेर सार्वजनिक गरिएको सूचीमा मात्रै दाबी बिरोधको सूचना जारी गर्नुको कुनै औचित्य छैन ।
तसर्थ, सार्वजनिक सूचीमा समावेश गरिएका गैर—पत्रकारहरुलाई शुद्धिकरण मापदण्ड अनुसार हटाएर सदस्यता प्राप्ति र नवीकरणबाट बञ्चित क्रियाशिल पत्रकारहरुलाई सूचीमा समावेश गर्न प्रेस चौतारी माग गर्दछ । अन्यथा, प्रेस चौतारी नेपाल पत्रकार महासंघको गरिमा रक्षा, गौरवममय विरासतको निरन्तरता र श्रमजीवी पत्रकारहरुको हितरक्षाको निम्ति जस्तोसुकै कदम चाल्न बाध्य हुने जानकारी गराइन्छ । यसबाट उत्पन्न हुने परिस्थितिको जिम्मेवार स्वयम् नेपाल पत्रकार महासंघको वर्तमान नेतृत्व हुनेछ ।’
बिज्ञप्तिको पूर्णपाठ
प्रेस विज्ञप्ति
प्रेस चौतारी नेपालको सचिवालयको आकस्मिक बैठक आज शनिबार (२७ असोज २०८०) मा संगठनका अध्यक्ष गणेश बस्नेतको अध्यक्षतामा केन्द्रीय कार्यालय, काठमाडौंमा बस्यो । नेपाल पत्रकार महासंघका महासचिव रोशन पुरीको नाममा (२६ असोज २०८०) मा जारी विज्ञप्तिप्रति बैठकको गम्भीर ध्यानाकर्षण भएको छ । ‘शुद्धीकरण समितिले निर्धारण गरेको मापदण्ड अनुसार प्रदेश समितिबाट प्रस्तावित सदस्यका नाम सार्वजनिक’ गरिएको भनी दाबी गरिएको नेपाल पत्रकार महासंघका सदस्यहरुको सूची देखेर प्रेस चौतारी नेपाल आश्चर्यचकित बनेको छ । व्यावसायिक तथा क्रियाशिल श्रमजीवी पत्रकारहरुलाई पत्रकार महासंघको सदस्यबाट बञ्चित गरेर जारी गरिएको यो सूचीप्रति प्रेस चौतारी नेपाल आपत्ति प्रकट गर्दछ ।
हामीलाई थाहा छ, प्रेस तथा अभिव्यक्ति स्वतन्त्रता रक्षा, श्रमजीवी पत्रकारहरुको पेशागत हितरक्षा, श्रम अधिकारको संरक्षण र व्यावसायिक पत्रकारिताको सम्र्बद्धनमा नेपाल पत्रकार महासंघले बनाएको इतिहास आफैमा गौरवमय छ । गएको सात दशक यता महासंघले अभ्यास गर्दै आएको मुल्य—मान्यता, स्थापित गरेको प्रणाली र लागू गर्दै आएको विधान, नियमावलीको जगमा महासंघ सबैको साझा संगठनको रुपमा स्थापित छ ।
तर, ती सबै अभ्यास, मुल्य—मान्यता, प्रणाली, विधान नियमावलीविपरित वर्तमान नेतृत्वले महासंघको आवश्यकता र औचित्य माथिनै प्रश्न उठ्ने गरी कदम चालेको प्रेस चौतारीको ठहर छ । महासंघलाई व्यावसायिक तथा श्रमजीवी पत्रकारहरुको संगठन नभई कुनै अमूक राजनीतिक दल र समूहको भातृ संगठनको रुपमा बदल्ने प्रयास गरिनु बिडम्बनापूर्ण छ । यो अग्रजहरुको कष्टसाध्य संघर्ष, योगदान र बलिदानबाट स्थापित आम नागरिकहरुको पनि भरोषायोग्य संगठनको गरिमा र सामाजिक स्वीकारोक्तिलाई कमजोर बनाउने प्रयास हो ।
नेपाल पत्रकार महासंघका सदस्यलाई शुद्धीकरण गर्दै नेपाल पत्रकार महासंघलाई व्यावसायिक तथा श्रमजीवी पत्रकारहरुको साझा र गौरवमय संगठनको रुपमा विकास गर्न प्रेस चौतारी दृढ रहेको पुनः स्मरण गराउन चाहन्छौं। तर,नेपाल पत्रकार महासंघले निर्धारण गरेका १५ बूँदे मापदण्ड, नेपाल पत्रकार महासंघको सुर्खेतमा सम्पन्न (८—९ पुस २०७९) साधारणसभाबाट गरिएको सर्वसम्मत निर्णय, श्रमजीवी पत्रकारहरुको संगठनबीच भएका सहमति र भावना विपरित छ । तसर्थ, महासंघद्वारा सार्वजनिक सूचना र सूचीलाई तत्काल सच्याउन प्रेस चौतारी नेपाल आग्रह गर्दछ ।
महासंघद्वारा जारी विज्ञप्तिमा सार्वजनिक नाम उपर मात्रै दाबी—विरोध, सफाइको मौका र न्यायका लागि आह्वान गर्ने समय निर्धारण गरिएको छ । व्यावसायिक तथा श्रमजीवी पत्रकारहरुलाई सदस्यता प्राप्ति र नवीकरणबाट बञ्चित गरेर सार्वजनिक गरिएको सूचीमा मात्रै दाबी बिरोधको सूचना जारी गर्नुको कुनै औचित्य छैन । तसर्थ, सार्वजनिक सूचीमा समावेश गरिएका गैर—पत्रकारहरुलाई शुद्धिकरण मापदण्ड अनुसार हटाएर सदस्यता प्राप्ति र नवीकरणबाट बञ्चित क्रियाशिल पत्रकारहरुलाई सूचीमा समावेश गर्न प्रेस चौतारी माग गर्दछ ।
अन्यथा, प्रेस चौतारी नेपाल पत्रकार महासंघको गरिमा रक्षा, गौरवममय विरासतको निरन्तरता र श्रमजीवी पत्रकारहरुको हितरक्षाको निम्ति जस्तोसुकै कदम चाल्न बाध्य हुने जानकारी गराइन्छ । यसबाट उत्पन्न हुने परिस्थितिको जिम्मेवार स्वयम् नेपाल पत्रकार महासंघको वर्तमान नेतृत्व हुनेछ ।
हिरामान लामा
महासचिव
मिति : २७ असोज २०८०
