लमहीमा मोटरसाइकल अनियन्त्रित भई पल्टिदा सिसहनियाँका राना मगरको मृत्यु

लमही १९ कार्तिक । दाङको देउखुरीमा मोटरसाइकल दुर्घटना हुँदा १ जनाको मृत्यु भएको छ । मृत्यु हुनेमा राप्ती गाउँपालिका-५ कमलरोड सिसहनियाँ निवासी वर्ष २२ का प्रेम राना मगर रहेको वडा प्रहरी कार्यालय लमहीका प्रहरी निरीक्षक प्रकाश भुसालले जानकारी दिएका छन् ।

सोमबार बिहान साढे ६ बजेको समयमा लमही – गढवा सडक खण्डमा लमहीबाट गढवा तर्फ जाँदै गरेको रा ७ प ४०७४ नम्बरको मोटरसाइकल लमही बजारको बैंक रोडमा अनियंत्रित हुँदा राना गम्भीर घाइते भएका थिए ।

मोटरसाइकल आफै अनियंत्रित भएर दुर्घटना भएको हो । दुर्घटनामा गम्भीर घाइते भएका राना मगरको लमही अस्पतालमा उपचारका क्रममा ज्यान गएको थियो । मृतक राना मगरको शव पोष्ट मार्टमका लागि लमही अस्पतालमा राखिएको छ ।