नेकपा विवाद विद्यार्थी संगठनमा पनि, संयोजक महरलाई कारबाही गरेको तामाङको घोषणा
काठमाडौं १० पुस । नेपाल कम्युनिस्ट पार्टीको विवाद भातृ संगठनमा पनि देखिन थालेको छ । शुक्रबार अनेरास्ववियूका सहसंयोजक रञ्जित तामाङको समूहले संयोजक ऐन महरलाई जिम्मेवारीबाट हटाएको घोषणा गरेको छ ।
संगठनको बहुमतको निर्णयले महरलाई कारबाही गरेको तामाङले शुक्रबार विज्ञप्ति जारी गरी जनाएका छन् । संगठनको नीति, निर्णय र विधान विपरीतका गतिविधि निरन्तर जारी राखेकाले अनेरास्ववियूको अन्तरिम विधान २०७६ को धारा ७ बमोजिम संगठनको बहुमतको निर्णयअनुसार उनलाई कारबाही गरिएको विज्ञप्तिमा उल्लेख छ ।
महरलाई गरिएको कारबाहीलाई अनुमोदन गर्नका लागि नेपाल कम्युनिस्ट पार्टी (नेकपा) का केन्द्रीय कमिटी समक्ष सिफारिस गरिएको विज्ञप्तिमा उल्लेख छ । सरकारले संसद विघटनको कदम चालेपछि नेकपा अहिले विभाजित छ । प्रचण्ड- माधव समूह र ओली समूहले बेग्लाबेग्लै केन्द्रीय कमिटी बैठक गरेका छन् ।
अनेरास्वयियूका सहसंयोजक तामाङ प्रचण्ड- माधव समूहतिर छन् भने संयोजक महर केपी ओली समूहतिर छन् ।
